Vendime të miratuara në mbledhjen e Këshillit të Ministrave, datë 11 Maj 2022:

 

 

V E N D I M
PËR

PËRCAKTIMIN E KUSHTEVE, AFATEVE DHE PROCEDURAVE PËR OFRIMIN E SHËRBIMEVE NGA SEKRETARIA E REGJISTRIT ELEKTRONIK, NËPËRMJET PORTALIT “E-ALBANIA”, KUSHTEVE DHE MËNYRAVE TË PAJISJES SË INDIVIDËVE ME TË DREJTAT PËRKATËSE TË AKSESIT ELEKTRONIK DHE PROCEDURAVE PËR NDRYSHIMIN E TYRE, KUSHTEVE TË SIGURISË DHE TË RUAJTJES SË KOMUNIKIMEVE ELEKTRONIKE, MËNYRAVE TË VËRTETIMIT TË DOKUMENTEVE ELEKTRONIKE, TË LËSHUARA NGA SEKRETARIA E REGJISTRIT ELEKTRONIK, TË KËRKESAVE E TEKNOLOGJISË SË ZBATUESHME PËR REALIZIMIN E TYRE, SI DHE PROCEDURAVE TË NJOFTIMEVE PUBLIKE, TË REALIZUARA NGA SEKRETARIA E REGJISTRIT ELEKTRONIK TË ORGANIZATAVE JOFITIMPRURËSE

Në mbështetje të nenit 100 të Kushtetutës dhe të nenit 48, të ligjit nr.80/2021, “Për regjistrimin e organizatave jofitimprurëse”, me propozimin e ministrit të Drejtësisë, Këshilli i Ministrave

V E N D O S I:

I. DISPOZITA TË PËRGJITHSHME

1. Ky vendim ka si objekt përcaktimin e kushteve, afateve dhe procedurave për ofrimin e shërbimeve nga sekretaria e regjistrit elektronik, nëpërmjet portalit “e-Albania”, kushteve dhe mënyrave të pajisjes së individëve me të drejtat përkatëse të aksesit elektronik dhe procedurave për ndryshimin e tyre, kushteve të sigurisë dhe të ruajtjes së komunikimeve elektronike, mënyrave të vërtetimit të dokumenteve elektronike, të lëshuara nga sekretaria e regjistrit elektronik, të kërkesave e teknologjisë së zbatueshme për realizimin e tyre, si dhe procedurave të njoftimeve publike, të realizuara nga sekretaria e regjistrit elektronik të organizatave jofitimprurëse.

2. Të gjithë termat e përcaktuar në nenin 3, të ligjit nr.80/2021, “Për regjistrimin e organizatave jofitimprurëse”, kanë të njëjtin kuptim edhe në këtë vendim, ndërsa me termat e mëposhtëm nënkuptohet:

a) “Sekretaria e regjistrit elektronik”, struktura përgjegjëse në Gjykatën e Rrethit Gjyqësor Tiranë për ofrimin e shërbimeve, sipas ligjit nr.80/2021, “Për regjistrimin e organizatave jofitimprurëse”.
b) “Lloji i regjistrimit”, regjistrimi fillestar, ndryshimi ose përditësimi i të dhënave për organizatat jofitimprurëse.

II. KUSHTET, AFATET DHE PROCEDURAT PËR OFRIMIN E SHËRBIMEVE NGA SEKRETARIA E REGJISTRIT ELEKTRONIK

1. Shërbimet e ofruara nga regjistri elektronik i organizatave jofitimprurëse ofrohen përmes sportelit elektronik, në portalin unik qeveritar “e-Albania” (në vijim “e-Albania”) dhe regjistrit elektronik pranë Gjykatës së Rrethit Gjyqësor Tiranë.

2. Personi i autorizuar, sipas përcaktimit të nenit 10, të ligjit nr.80/2021, “Për regjistrimin e organizatave jofitimprurëse”, që kërkon të kryejë një regjistrim, duhet të identifikohet fillimisht në këtë portal.

3. Pas autentifikimit, sipas pikës 2, të këtij kreu, personi akseson portalin “e-Albania” dhe zgjedh llojin e regjistrimit që kërkohet të kryhet. Pas përzgjedhjes së llojit të regjistrimit, shfaqet formulari përkatës i kërkesës, sipas formatit të miratuar, duke krijuar një numër çështjeje CN në regjistrin elektronik të organizatave jofitimprurëse.

4. Pas shfaqjes së formularit dhe hapjes së numrit të çështjes në regjistrin elektronik, personi i autentifikuar plotëson elektronikisht formularin në të gjitha rubrikat e tij, sipas llojit të regjistrimit që kërkohet të kryhet.

5. Personi i autentifikuar ngarkon në formular, sipas pikës 3, të këtij kreu, dokumentet shoqëruese të krijuara apo të konvertuara prej tij në format elektronik.

6. Pasi personi i autentifikuar verifikon se të dhënat e plotësuara në formular dhe dokumentet shoqëruese të ngarkuara janë të sakta, i konfirmon ato me mjete elektronike që garantojnë autenticitetin e origjinës dhe pacenueshmërinë e përmbajtjes së dokumenteve në format elektronik, të paktën nëpërmjet nënshkrimit elektronik të formularit të kërkesës, sipas përcaktimeve të legjislacionit në fuqi për nënshkrimin elektronik.

7. Pas dërgimit elektronik të kërkesës në portalin “e-Albania” shfaqet konfirmimi i dërgimit me sukses të kërkesës, i cili përmban numrin e dhënë automatikisht nga regjistri elektronik i informatizuar (numrin e çështjes CN), i cili i mundëson kërkuesit të ndjekë në çdo kohë gjendjen e procesit të regjistrimit. Gjithashtu, personit i dërgohet një kopje elektronike e formularit të kërkesës në sesionin “Dokumentet e mia” në hapësirën e tij në portalin “e-Albania”.

8. Njoftimi i konfirmimit të dërgimit me sukses të kërkesës bëhet edhe përmes postës elektronike të qytetarit, bazuar në të dhënat e vetëdeklaruara në profilin e tij në portalin “e-Albania”.

8. Me lëshimin e konfirmimit të paraqitjes së kërkesës, regjistri elektronik ua kalon, për shqyrtim e vendimmarrje, nëpunësve të autorizuar kërkesën dhe dokumentet shoqëruese, të paraqitura nëpërmjet portalit “e-Albania”.

10. Gjykata e Rrethit Gjyqësor Tiranë merr në shqyrtim kërkesat për regjistrim sipas radhës së paraqitjes së tyre.

11. Gjatë afatit të shqyrtimit dhe vlerësimit të kërkesës, Gjykata e Rrethit Gjyqësor Tiranë i mundëson kërkuesit ndjekjen e statusit të kërkesës në portalin unik qeveritar “e-Albania”, nëpërmjet përdorimit të numrit të çështjes (CN), të dhënë me konfirmimin e dërgimit me sukses të kërkesës.

12. Sekretaria e regjistrit elektronik lëshon një konfirmim, sipas formatit të miratuar për çdo kërkesë të dorëzuar, ku përcaktohen koha e dorëzimit, numri rendor i paraqitjes së kërkesës, objekti i kërkesës, lista e dokumenteve të dorëzuara dhe shuma e tarifës së paguar, i cili i dërgohet elektronikisht kërkuesit.

13. Sekretaria e regjistrit elektronik regjistron në regjistrin elektronik vendimin e gjyqtarit për regjistrimin ose çregjistrimin e organizatës jofitimprurëse, si dhe vendimin e kancelarit për regjistrime të tjera, ditën kur vendimi ka marrë formë të prerë. Menjëherë, me regjistrimin e vendimit, sekretaria e regjistrit elektronik lëshon certifikatën e regjistrimit ose vërtetimin e kryerjes së regjistrimeve të tjera me vulë elektronike.

III. KUSHTET DHE MËNYRAT E PAJISJES SË INDIVIDËVE ME TË DREJTAT PËRKATËSE TË AKSESIT ELEKTRONIK DHE PROCEDURAT PËR NDRYSHIMIN E TYRE

1. Veprimet në regjistrin elektronik të Gjykatës së Rrethit Gjyqësor Tiranë kryhen nëpërmjet mjeteve elektronike që garantojnë autenticitetin e origjinës dhe pacenueshmërinë e përmbajtjes së dokumenteve në format elektronik nëpërmjet nënshkrimit elektronik, sipas përcaktimeve të legjislacionit në fuqi për nënshkrimin elektronik.

2. Çdo subjekt, i cili, në cilësinë e kërkuesit apo personit të autorizuar, kërkon të marrë shërbime lidhur me regjistrimin e organizatave jofitimprurëse në regjistrin elektronik, duhet të regjistrohet fillimisht në portalin “e-Albania”.

3. Pas regjistrimit në portal, subjekti ka të drejtë të dërgojë elektronikisht kërkesë për regjistrimin e organizatës jofitimprurëse në regjistrin elektronik të Gjykatës së Rrethit Gjyqësor Tiranë duke plotësuar formularin standard të kërkesës, si dhe duke ngarkuar dokumentet shoqëruese të nevojshme të cilat duhet të shoqërojnë kërkesën, sipas procedurës së përcaktuar në kreun II, të këtij vendimi.

4. Me pranimin e kërkesës dhe regjistrimin e organizatës jofitimprurëse në regjistrin elektronik, identifikimi në portal dhe paraqitja e kërkesave të tjera bëhen përmes identifikimit të organizatës jofitimprurëse në portal nëpërmjet numrit unik të identifikimit të subjektit dhe fjalëkalimit, në përputhje me rregullat e përcaktuara për përdorimin e portalit “e-Albania”.

5. Ndryshimi i të dhënave të identifikimit në portalin “e-Albania” bëhet në përputhje me rregullat e përcaktuara nga Agjencia Kombëtare e Shoqërisë së Informacionit, si autoriteti përgjegjës për administrimin dhe mirëmbajtjen e këtij portali si dhe me legjislacionin në fuqi.

IV. KUSHTET E SIGURISË DHE TË RUAJTJES SË KOMUNIKIMEVE ELEKTRONIKE, MËNYRAT E VËRTETIMIT TË DOKUMENTEVE ELEKTRONIKE, TË LËSHUARA NGA SEKRETARIA E REGJISTRIT ELEKTRONIK

1. Përpunimi i të dhënave të paraqitura përmes sportelit elektronik nga sekretaria e regjistrit elektronik në Gjykatën e Rrethit Gjyqësor Tiranë bëhet në përputhje me legjislacionin në fuqi për mbrojtjen e të dhënave personale.

2. Dokumentet elektronike të lëshuara nga sekretaria e regjistrit elektronik vërtetohen nëpërmjet vulës elektronike, në përputhje me legjislacionin në fuqi.

V. PROCEDURAT E NJOFTIMEVE PUBLIKE, TË REALIZUARA NGA SEKRETARIA E REGJISTRIT ELEKTRONIK

1. Sekretaria e regjistrit elektronik publikon në Buletinin e Njoftimeve Zyrtare të Regjistrimit të dhënat e regjistrimit në formatet e miratuara, brenda 1 (një) dite nga data e kryerjes së regjistrimit, sipas këtij vendimi. Buletini i Njoftimeve Zyrtare të Regjistrimit dhe regjistri elektronik janë lirisht të aksesueshëm për publikun në faqen zyrtare të internetit të Gjykatës së Rrethit Gjyqësor Tiranë.

2. Të gjitha veprimet e kryera në regjistrin elektronik, në përputhje me ligjin nr.80/2021, “Për regjistrimin e organizatave jofitimprurëse”, dhe me dispozitat e këtij vendimi, si dhe pamja e plotë elektronike e çdo dokumenti shoqërues pasqyrohen në mënyrë elektronike dhe janë lirisht të aksesueshme për publikun në faqen zyrtare të internetit të Gjykatës së Rrethit Gjyqësor Tiranë, me përjashtim të të dhënave për adresën e individëve.

3. Çdo person, pasi të jetë identifikuar elektronikisht në portalin “e-Albania”, sipas kreut III, të këtij vendimi, ka të drejtë që, në cilësinë e kërkuesit apo të personit të autorizuar, të paraqesë një kërkesë për regjistrim, përmes shërbimit elektronik përkatës dhe të marrë nga sekretaria e regjistrit elektronik nëpërmjet këtij portali të gjitha aktet përkatëse të parashikuara nga ligji nr.80/2021, “Për regjistrimin e organizatave jofitimprurëse”.

4. Çdo shtetas, pa qenë i detyruar të identifikohet elektronikisht, ka të drejtë të kryejë kërkime elektronike në regjistër, të marrë ekstrakte, si dhe dokumente shoqëruese në format elektronik, për të cilat identifikimi i personit ose kryerja e pagesës së një tarife nëpërmjet mjeteve elektronike nuk kërkohet, sipas ligjit nr.80/2021, “Për regjistrimin e organizatave jofitimprurëse”.

5. Ekstraktet mund të lëshohen, sipas formatit të miratuar, për të dhëna të caktuara të subjekteve dhe/ose për historikun e veprimeve të kryera nga një subjekt.

6. Ekstraktet dhe dokumentet shoqëruese në format elektronik, si rregull, lëshohen nga sekretaria e regjistrit elektronik, si kopje e vërtetuar e të dhënave të regjistruara apo e dokumenteve shoqëruese përkatëse, përveç rastit kur personi i interesuar heq dorë nga marrja e këtij vërtetimi.

VI. DISPOZITA TË FUNDIT

1. Gjykata e Rrethit Gjyqësor Tiranë dhe autoriteti përgjegjës për administrimin e portalit “e-Albania” marrin masat për respektimin e kushteve dhe kritereve të përcaktuara në legjislacionin në fuqi për zhvillimin e shërbimeve elektronike.

2. Ngarkohen Ministria e Drejtësisë, Gjykata e Rrethit Gjyqësor Tiranë, Agjencia Kombëtare e Shoqërisë së Informacionit dhe organizatat jofitimprurëse për zbatimin e këtij vendimi.

Ky vendim hyn në fuqi pas botimit në “Fletoren zyrtare”.

K R Y E M I N I S T R I
EDI RAMA

***

V E N D I M
PËR

EKZEKUTIMIN E VENDIMIT TË GJYKATËS EVROPIANE PËR TË DREJTAT E NJERIUT, DATË 19.10.2021, PËR ÇËSHTJEN “LAÇI KUNDËR SHQIPËRISË”, KËRKESA NR.28142/17

Në mbështetje të nenit 100 të Kushtetutës, të nenit 46 të Konventës Evropiane për Mbrojtjen e të Drejtave të Njeriut dhe Lirive Themelore, ratifikuar me ligjin nr.8137, datë 31.7.1996, “Për ratifikimin e Konventës Evropiane për Mbrojtjen e të Drejtave të Njeriut dhe Lirive Themelore”, të neneve 5 e
45, të ligjit nr.9936, datë 26.6.2008, “Për menaxhimin e sistemit buxhetor në Republikën e Shqipërisë”, të ndryshuar, dhe të nenit 14, të ligjit nr.115/2021, “Për buxhetin e vitit 2022”, të ndryshuar, me propozimin Zëvendëskryeministrit, Këshilli i Ministrave

V E N D O S I:

1. Ekzekutimin e vendimit të Gjykatës Evropiane për të Drejtat e Njeriut, datë 19.10.2021, për çështjen “Laçi kundër Shqipërisë”, kërkesa nr.28142/17, përfundimtar në datën 19.1.2022, në shumën 10 500 (dhjetë mijë e pesëqind) euro për mbulimin e dëmit jopasuror dhe kosto e shpenzime, plus çdo taksë që mund të jetë e aplikueshme.

2. Vlera e përcaktuar si detyrim në pikën 1, të këtij vendimi, të konvertohet në lekë, në bazë të kursit të këmbimit të bankës, ku depozitohen shumat në datën e kryerjes së pagesës.

3. Vlera e përcaktuar si detyrim në pikën 1, të këtij vendimi, të depozitohet në një nga bankat e nivelit të dytë, në emër të kërkuesit Mustafa Laçi, në vlerën që shteti shqiptar detyrohet, sipas vendimit përfundimtar të Gjykatës Evropiane për të Drejtat e Njeriut, datë 19.10.2021.

4. Pagimi i shumës së depozituar, sipas përcaktimeve në pikën 3, të këtij vendimi, në favor të kërkuesit Mustafa Laçi, të bëhet nga Ministria e Financave dhe Ekonomisë pas paraqitjes së dokumentacionit të nevojshëm ligjor për kryerjen e pagesave nga buxheti i shtetit, brenda afatit 3-mujor nga dita kur vendimi i Gjykatës është bërë përfundimtar.

5. Në rast mospagimi brenda afatit tremujor të përmendur në pikën 4, të këtij vendimi, mbi shumën e përcaktuar në pikën 1, të këtij vendimi, paguhen interesa të thjeshta, të barabarta me kursin margjinal të huas së Bankës Qendrore Evropiane, gjatë periudhës së mospagimit, plus 3 (tre) për qind.

6. Efekti financiar, i përcaktuar në pikën 1, të këtij vendimi, të përballohet nga fondi rezervë i buxhetit të shtetit për vitin 2022.

7. Ngarkohet Ministria e Financave dhe e Ekonomisë për zbatimin e këtij vendimi.

Ky vendim hyn në fuqi menjëherë dhe botohet në “Fletoren zyrtare”.

K R Y E M I N I S T R I
EDI RAMA

***

V E N D I M
PËR

PROCEDURAT QË NDIQEN PËR FINANCIMIN E PROJEKTEVE ARTISTIKE

Në mbështetje të nenit 100 të Kushtetutës dhe të pikës 3, të nenit 26, të ligjit nr.10352, datë 18.11.2010, “Për artin dhe kulturën”, të ndryshuar, me propozimin e ministrit të Kulturës, Këshilli i Ministrave

V E N D O S I:

I. DISPOZITA TË PËRGJITHSHME

1. Ky vendim ka për qëllim përcaktimin e procedurës për financimin e projekteve artistike në fushën e artit pamor, si dhe shpalljen e konkurseve kombëtare dhe/ose ndërkombëtare për realizimin e tyre në hapësira publike, në zbatim të parashikimit të dhënë në shkronjën “b”, të pikës 1, të nenit 26, të ligjit nr.10352, datë 18.11.2010, “Për artin dhe kulturën”, të ndryshuar.

2. Projektet artistike, të financuara sipas procedurave të parashikuara në përmbajtje të këtij vendimi, realizohen në përputhje me parametrat e veprës së artit dhe hapësirat publike.

3. Rast pas rasti, ministri përgjegjës për artin dhe kulturën mund të urdhërojë ngritjen e grupit ndërinstitucional të punës, i cili përcakton parametrat e veprës së artit dhe hapësirat publike për vendosjen e tyre.

II. PROCEDURAT E ORGANIZIMIT TË KONKURRIMIT PUBLIK KOMBËTAR OSE NDËRKOMBËTAR PËR FINANCIMIN E PROJEKTEVE ARTISTIKE

1. Me propozim të Kolegjiumit, ministri përgjegjës për artin dhe kulturën miraton urdhrin për shpalljen e konkursit kombëtar ose ndërkombëtar, i cili publikohet në median kombëtare kur konkursi është kombëtar dhe në median ndërkombëtare për konkurset ndërkombëtare, si dhe në çdo rast në faqen zyrtare të ministrisë përgjegjëse për artin dhe kulturën.

2. Urdhri për shpalljen e konkursit kombëtar ose ndërkombëtar përmban:

a) mënyrën dhe kohëzgjatjen e publikimit të njoftimit të konkursit kombëtar ose ndërkombëtar;
b) detyrën e projektimit, në të cilën pasqyrohen vendndodhja e hapësirës publike dhe përmasat e veprës artistike;
c) dokumentacionin që duhet të paraqesin artistët pjesëmarrës në konkurs;
ç) formatin e paraqitjes së projektidesë;
d) afatin e paraqitjes së projektidesë e të dokumentacionit dhe mënyrën e realizimit/prodhimit të veprës për ato projektide të cilat kualifikohen nga juria, sipas parashikimeve të fazës së parë të seleksionimit, në përputhje me përcaktimin e pikës 9, të këtij vendimi;
dh) vendin e dorëzimit të projektidesë dhe vendin e dorëzimit të dokumentacionit;
e) masën e shpërblimit për fituesin.

3. Artistët, me qëllim pjesëmarrjen në konkurs, dorëzojnë projektidenë dhe dokumentacionin e mëposhtëm në kohën dhe vendin e përcaktuar, sipas pikës 2, të këtij kreu:

a) Projektidenë ose bocetin e veprës artistike, si dhe materialet shoqëruese të tyre, sipas kërkesës së thirrjes për paraqitjen e idesë;
b) Portofolin e artistit, ku përfshihet jetëshkrimi i artistit, si dhe të paktën 2 foto profesionale të punimeve të ngjashme;
c) Llojin e materialit që parashikohet të përdoret për realizimin e veprës artistike.

4. Artistët, të cilët kualifikohen për të marrë pjesë në fazën e dytë të përzgjedhjes nga ana e jurisë, në zbatim të parashikimit të pikës 9, të këtij vendimi, dorëzojnë dokumentacionin e mëposhtëm në vendin dhe kohën e përcaktuar sipas pikës 2, të këtij kreu, në lidhje me:

a) projektin inxhinierik ose arkitektonik për realizimin dhe ndërtimin e veprës, nëse ka të tillë;
b) përshkrimin e detajuar të fazave të realizimit të veprës artistike;
c) kohën dhe grafikun e realizimit të veprës, sipas periudhave kohore të parashikuara nga artisti;
ç) vlerën totale të veprës, të detajuar sipas preventivit, përfshirë shpërblimin për të drejtën e autorit mbi veprën artistike të krijuar;
d) vetëdeklarimin për angazhimin e artistit në realizimin dhe prodhimin/ndërtimin fizik të veprës artistike, deri në momentin e vendosjes së saj në hapësirën publike të miratuar;
dh) vetëdeklarimin e artistit për disponibilitetin e tij për punimet e mirëmbajtjes së veprës artistike për një afat 2-vjeçar nga momenti i vendosjes së saj në hapësirën publike të miratuar, në rast dëmtimi.

5. Me përfundimin e afatit për dorëzimin e projektideve nga artistët pjesëmarrës në konkurs në formën e paraqitjes sipas kërkesave të thirrjes, ministri përgjegjës për artin dhe kulturën miraton urdhrin për ngritjen e jurisë.

6. Juria përzgjedh listën e projektideve dhe të artistëve të kualifikuar për në fazën e dytë të seleksionimit, si dhe listën e projektideve më të mira, bazuar në vlerësimin artistik të veprës në raport me kërkesën, sipas renditjes përkatëse.

7. Juria përbëhet nga jo më pak se 5 personalitete të shquara kombëtare ose ndërkombëtare në fushën e artit e të kulturës, të cilët përzgjidhen nga ministri përgjegjës për artin dhe kulturën. Anëtarët e jurisë nuk duhet të kenë konflikt interesi me pjesëmarrësit në konkurs, në përputhje me dispozitat e legjislacionit në fuqi për parandalimin e konfliktit të interesave në ushtrimin e funksioneve publike.

8. Kolegjumi harton listën e artistëve, të cilët kanë shprehur interesin në kohën dhe sipas formës së parashikuar në pikat 2 dhe 3, të këtij kreu, të cilën ia kalon për vlerësim jurisë. Artistët, të cilët nuk përmbushin këto kërkesa, nuk përfshihen në listë dhe konsiderohen se nuk kanë shprehur formalisht interesin e tyre.

9. Juria e konkursit vlerëson projektpropozimet dhe portofolet e artistëve të përfshirë në listën e artistëve, që kanë shprehur interes, duke hartuar listën e artistëve që kanë paraqitur projektidetë më të vlerësuara, të përzgjedhura për t’u kualifikuar në fazën e dytë të konkursit. Kjo listë i dorëzohet Kolegjumit, i cili njofton artistët për të përmbushur kërkesat e parashikuara në pikën 4, të këtij kreu. Nga artistët, të cilët paraqesin dokumentacionin e parashikuar në pikën 4, juria rendit ata të cilët klasifikohen sipas vlerësimit artistik më të mirë të veprës.

10. Kolegjiumi, në zbatim të nenit 27/1, të ligjit nr.10352, datë 18.11.2010, “Për artin dhe kulturën”, i ndryshuar, përzgjedh me sistem pikëzimi fituesin e konkursit, bazuar në listën e përcjellë nga juria, sipas pikës 9, të këtij kreu. Metoda e sistemit të pikëzimit përcaktohet në urdhrin e ministrit që ngre Kolegjiumin.

11. Për vlerësimin me pikë të artistëve pjesëmarrës në konkurs, Kolegjiumi bazohet në kriteret e mëposhtme të vlerësimit:

a) Kapacitetet teknike të siguruara nëpërmjet marrëveshjes me subjekte që përfshijnë teknologji, hapësirën, mjetet në dispozicion për realizimin e projektidesë së dorëzuar, si dhe burimet njerëzore që disponojnë;
b) Çmimin më të ulët të ofruar në përpjesëtim me cilësinë e projektidesë;
c) Afatin e realizimit të veprës sipas grafikut të paraqitur, në përputhje me përcaktimin e shkronjës “c”, të pikës 4, të këtij kreu.

12. Pas shqyrtimit dhe vlerësimit të kërkesave e propozimeve të dorëzuara, Kolegjiumi i propozon ministrit përgjegjës për artin dhe kulturën klasifikimin përfundimtar të artistëve konkurrues me të cilët ministria përgjegjëse për artin lidh kontratën përkatëse.

13. Ministri përgjegjës për artin dhe kulturën miraton projektin fitues, i cili publikohet në faqen zyrtare të ministrisë përgjegjëse për artin dhe kulturën dhe Buletinin e Njoftimeve Publike, jo më vonë se 10 (dhjetë) ditë nga data e shpalljes së fituesit.

14. Njoftimi i publikuar në Buletinin e Njoftimeve Publike përmban:

a) emrin e fituesit të konkursit dhe adresën e tij;
b) afatin për nënshkrimin e kontratës.

15. Ministri përgjegjës për artin dhe kulturën nënshkruan kontratën me fituesin e konkursit, e cila, ndër të tjera, përmban:

a) projektidenë e veprës dhe vendin e vendosjes së saj;
b) projektin e detajuar të realizimit të veprës, si dhe përshkrimin e detajuar të fazave të realizimit të veprës artistike fituese;
c) planin kohor të detajuar në afate për realizimin e veprës;
ç) detyrimin e fituesit të konkursit për ndjekjen e të gjitha fazave për prodhimin fizik të veprës deri në vendosjen e saj në hapësirën publike të miratuar për këtë qëllim;
d) përcaktimin e së drejtës së pronës së institucionit publik mbi veprën artistike.

16. Struktura përgjegjëse për artin dhe kulturën ndjek dhe mbikëqyr zbatimin e kontratës së nënshkruar sipas pikës 15, të këtij kreu, deri në momentin e vendosjes së saj në hapësirën publike të miratuar për këtë qëllim.

17. Disbursimi i fondit realizohet, sipas fazave të mëposhtme:

a) 50% e shumës i parapaguhet fituesit të konkursit brenda 30 (tridhjetë) ditëve nga nënshkrimi i kontratës;
b) 25% e shumës i paguhet fituesit të konkursit pas marrjes në dorëzim të raportit përshkrues, dokumentacionit justifikues të aktivitetit, si dhe shpenzimeve të kryera brenda 60 (gjashtëdhjetë) ditëve mbas parapagimit të parë, konfirmuar me:

i. kontratat e shërbimit me të tretët;
ii. faturat tatimore, të mbledhura sipas legjislacionit në fuqi;

c) 25% e shumës së mbetur pas pagesës së kryer sipas shkronjave “a” dhe “b”, të kësaj pike, i paguhet fituesit të konkursit në përfundim të vendosjes përfundimtare të veprës fituese si dhe inaugurimit të saj, duke ndjekur grafikun e realizimit të veprës dhe, në çdo rast, pasi është marrë raporti përshkrues, dokumentacioni justifikues që justifikon shpenzimet e kryera deri në atë moment.

18. Disbursimi i fondit, sipas përcaktimit të bërë në pikën 17, të këtij kreu, mbikëqyret nga struktura përgjegjëse për artin dhe kulturën.

19. Me kalimin e vlerës totale fituesit, vepra kalon në pronësi të shtetit shqiptar, ndërsa të drejtat autoriale i mbeten artistit, sipas legjislacionit në fuqi për të drejtat e autorit.

III. PROCEDURA E ANKIMIT ADMINISTRATIV

1. Ndaj vendimit të shkualifikimit, subjektet e interesuara kanë të drejtë të paraqesin ankim pranë ministrit përgjegjës për artin dhe kulturën, brenda 5 (pesë) ditëve nga data e njoftimit të vendimit të shkualifikimit.

2. Paraqitja e ankimit sipas pikës 1, të këtij kreu, pezullon procedurën për lidhjen e kontratës me subjektin/artistin që është shpallur fitues me urdhër të ministrit përgjegjës për artin dhe kulturën.

3. Shqyrtimi i ankimit realizohet nga një grup pune, i ngritur me urdhër të ministrit përgjegjës për artin dhe kulturën, brenda (dhjetë) 10 ditëve nga data e paraqitjes së ankimit administrativ.

4. Grupi i punës shqyrton ankimin dhe i paraqet ministrit përgjegjës për artin dhe kulturën relacionin me propozimin për:

a) rrëzimin e ankimit; ose
b) pranimin e ankimit, anulimin e procedurës së deritanishme, si dhe rifillimin e procedurës së re të konkurrimit.

5. Kundër urdhrit të ministrit, të miratuar sipas pikës 4, të këtij kreu, subjektet e interesuara kanë të drejtë të ushtrojnë ankim në gjykatën kompetente për shqyrtimin e mosmarrëveshjeve administrative. Ky ankim nuk pezullon zbatimin e aktit administrativ.

IV. DISPOZITA TË FUNDIT

1. Vendimi nr.510, datë 18.7.2012, i Këshillit të Ministrave, “Për shpalljen e konkurseve kombëtare dhe ndërkombëtare për realizimin e veprave monumentale të artit pamor në hapësirat publike”, shfuqizohet.

2. Ngarkohet Ministria e Kulturës për zbatimin e këtij vendimi.

Ky vendim hyn në fuqi pas botimit në “Fletoren zyrtare”.

K R Y E M I N I S T R I
EDI RAMA

***

V E N D I M
PËR

MIRATIMIN E MARRËVESHJES SË GRANTIT SHOQËRUES, NDËRMJET REPUBLIKËS SË SHQIPËRISË (MARRËSI), TË PËRFAQËSUAR NGA MINISTRIA E FINANCAVE DHE EKONOMISË, DHE KFW FRANKFURT AM MAIN (KFW), DHE KORPORATËS ELEKTROENERGJETIKE SHQIPTARE (KESH) (AGJENCIA E ZBATIMIT TË PROJEKTIT), MASAT SHOQËRUESE PËR REHABILITIMIN E HIDROCENTRALIT TË FIERZËS

Në mbështetje të nenit 100 të Kushtetutës dhe të nenit 19, të ligjit nr.43/2016, “Për marrëveshjet ndërkombëtare në Republikën e Shqipërisë”, me propozimin e ministrit të Financave dhe Ekonomisë, Këshilli i Ministrave

V E N D O S I:

Miratimin e marrëveshjes së grantit shoqërues, ndërmjet Republikës së Shqipërisë (marrësi), të përfaqësuar nga Ministria e Financave dhe Ekonomisë, dhe KfW Frankfurt am Main (KfW), dhe Korporatës Elektroenergjetike Shqiptare (KESH) (agjencia e zbatimit të projektit), masat shoqëruese për rehabilitimin e hidrocentralit të Fierzës, sipas tekstit që i bashkëlidhet këtij vendimi.

Ky vendim hyn në fuqi pas botimit në “Fletoren zyrtare”.

K R Y E M I N I S T R I
EDI RAMA

***

V E N D I M
PËR

MIRATIMIN E KLASIFIKIMIT STANDARD NDËRKOMBËTAR TË ARSIMIT KSNA 2011 (ISCED 2011), TË FUSHAVE TË ARSIMIT DHE TË TRAJNIMIT TË KSNA 2013 (KSNA-F 2013) DHE TË PËRSHKRIMEVE TË TYRE TË DETAJUARA

Në mbështetje të nenit 100 të Kushtetutës dhe të pikës 5, të nenit 24, të ligjit nr.17/2018, “Për statistikat zyrtare”, me propozimin e Kryeministrit, Këshilli i Ministrave

V E N D O S I:

1. Miratimin e zbatimit të Klasifikimit Standard Ndërkombëtar të Arsimit KSNA 2011 (ISCED 2011), miratuar nga Komisioni Kombëtar për Nomenklaturën, sipas lidhjes nr.1, që i bashkëlidhet këtij vendimi.

2. Fushat e arsimit dhe trajnimit të KSNA 2013 (KSNA-F 2013) dhe përshkrimet e tyre të detajuara, miratuar nga Komisioni Kombëtar për Nomenklaturën, janë përkatësisht sipas lidhjeve nr.2 dhe nr.3, që i bashkëlidhen këtij vendimi.

3. Klasifikimi Standard Ndërkombëtar i Arsimit KSNA 2011 (ISCED 2011), fushat e arsimit dhe trajnimit të KSNA (KSNA-F 2013) dhe përshkrimet e tyre të detajuara zbatohen për unifikimin e sistemit arsimor në Republikën e Shqipërisë në drejtim të klasifikimit e të publikimit të të dhënave statistikore zyrtare për nivelet dhe fushat e arsimit.

4. Institucionet zbatuese të KSNA-së ngarkohen të krijojnë lidhje transparente ndërmjet KSNA-së dhe Kornizës Shqiptare të Kualifikimeve.

5. Ngarkohen Ministria e Arsimit dhe Sporteve, Ministria e Financave dhe Ekonomisë, institucionet arsimore parauniversitare, institucionet e arsimit të lartë, institucionet ofruese të arsimit e të formimit profesional dhe prodhuesit e statistikave zyrtare, sipas legjislacionit për statistikat zyrtare, për zbatimin e këtij vendimi.

Ky vendim hyn në fuqi pas botimit në “Fletoren zyrtare”.

K R Y E M I N I S T R I
EDI RAMA

***

V E N D I M
PËR

SPECIFIKIMET DHE PËRMBAJTJEN E KODIFIKIMIT TË PROGRAMEVE TË STUDIMIT TË OFRUARA NGA INSTITUCIONET E ARSIMIT TË LARTË NË REPUBLIKËN E SHQIPËRISË

Në mbështetje të nenit 100 të Kushtetutës dhe të pikës 4, të nenit 86, të ligjit nr.80/2015, “Për arsimin e lartë dhe kërkimin shkencor në institucionet e arsimit të lartë në Republikën e Shqipërisë”, me propozimin e ministrit të Arsimit dhe Sportit, Këshilli i Ministrave

V E N D O S I:

1. Grupimin e programeve të studimit, të ofruara nga institucionet e arsimit të lartë, sipas elementeve të mëposhtme:

a) Identifikimi i llojit të programit të studimit. Ky element përmban 4 (katër) karaktere, ku përcaktohet niveli i tij referuar Kornizës Shqiptare të Kualifikimeve, kohëzgjatja e programit të studimit dhe lloji i programit;
b) Fusha e detajuar, në të cilën bën pjesë programi i studimit. Ky element përbëhet nga 4 (katër) shifra, sipas shtojcës nr.1, që i bashkëlidhet këtij vendimi dhe është pjesë përbërëse e tij, referuar Klasifikimit Standard Ndërkombëtar të Arsimit 2011 (KSNA 2011), Fushat e Arsimit dhe Trajnimit 2013 ( KSNA-F 2013);
c) Një shkronjë, e cila identifikon gjuhën në të cilën zhvillohet programi i studimit, sipas shtojcës nr.2, që i bashkëlidhet këtij vendimi dhe është pjesë përbërëse e tij.

2. Identifikimi i llojit të programit të studimit përcaktohet, si më poshtë vijon:

a) Programe studimi me karakter profesional me 60 ECTS (51PP);
b) Programe studimi me karakter profesional me 120 ECTS (52PP);
c) Bachelor, jo më pak se 180 ECTS (63BA);
ç) Master profesional me 60 ECTS (71MP);
d) Master profesional me 120 ECTS (72MP);
dh) Master i shkencave, jo më pak se 120 ECTS (72MS);
e) Master i arteve, jo më pak se 120 ECTS (72MA);
ë) Program i integruar i studimeve të ciklit të dytë me 300 ECTS (75MI);
f) Program i integruar i studimeve të ciklit të dytë me 360 ECTS (76MI);
g) Master ekzekutiv me 60 ECTS (81ME);
gj) Master ekzekutiv me 120 ECTS (82ME);
h) Specializim afatgjatë, me kohëzgjatje 2 vite akademike, me 120 ETCS, (82SA);
i) Specializim afatgjatë, me kohëzgjatje 3 vite akademike, me 180 ECTS, (83SA);
j) Specializim afatgjatë, me kohëzgjatje 4 vite akademike, me 240 ECTS, (84SA);
k) Specializim afatgjatë, me kohëzgjatje 5 vite akademike, me 300 ECTS, (85SA);
l) Doktoratë (83DO).

3. Për programet e studimit, të cilat ofrohen me kohë të zgjatur, përveç elementeve të përcaktuara në pikën 1, të këtij vendimi, në fillim të kodit shënohet shkronja “Z”.

4. Për programet e përbashkëta të studimit, përveç elementeve të përcaktuara në pikat 1 dhe 2, të këtij vendimi, në fillim të kodit shtohet shkronja “P”.

5. Për programet e studimit të formimit të vazhduar, elementet e kodit, që përcaktojnë identifikimin e llojit të programit të studimit, përbëhen nga lloji i programit të studimit “SFV” (studim i formimit të vazhduar). Elementet e tjera të kodifikimit për këto programe studimi janë sipas përcaktimeve të shkronjave “b” dhe “c”, të pikës 1, të këtij vendimi.

6. Vlerësimi i fushave të programeve të studimit ndërdisiplinor dhe rasteve të veçanta kryhet në përputhje me rregullat e përcaktimet e referuara në Fushat e Arsimit dhe Trajnimit 2013 (KSNA-F 2013).

7. Për programet ekzistuese të studimit, institucionet e arsimit të lartë dërgojnë zyrtarisht në ministrinë përgjegjëse për arsimin, propozimin/et e tyre të argumentuar/a lidhur me kodet, që duhet të përmbajnë të gjitha programet e studimit që ato ofrojnë, në përputhje me përcaktimet e këtij vendimi.

8. Për programet e reja të studimit, kodi i programit të studimit përfshihet në aplikimin e institucionit të arsimit të lartë për hapjen e programit të studimit dhe vlerësohet nga ministria përgjegjëse për arsimin në funksion të procedurave për hapjen e programit të studimit.

9. Kodifikimi i programeve të studimit kryhet nga ministria përgjegjëse për arsimin, në bashkëpunim me institucionet e arsimit të lartë, të cilat ofrojnë programet që do të kodifikohen, bazuar në procedurat e miratuara me udhëzim të ministrit përgjegjës për arsimin.

10. Instituti i Statistikave i Republikës së Shqipërisë (INSTAT) raporton statistikat e arsimit të lartë, sipas këtij vendimi.

11. Ngarkohen Ministria e Arsimit dhe Sportit, Agjencia e Sigurimit të Cilësisë në Arsimin e Lartë, Qendra e Shërbimeve Arsimore, Instituti i Statistikave i Republikës së Shqipërisë, si dhe institucionet e arsimit të lartë për zbatimin e këtij vendimi.

Ky vendim hyn në fuqi pas botimit në “Fletoren zyrtare”.

K R Y E M I N I S T R I
EDI RAMA

***

V E N D I M
PËR

MIRATIMIN E KONTRATËS SË KONCESIONIT/PARTNERITET PUBLIK PRIVAT, PËR PROJEKTIMIN, NDËRTIMIN DHE MIRËMBAJTJEN E “PORTIT TË INTEGRUAR” NË TRIPORT VLORË, NDËRMJET MINISTRISË SË INFRASTRUKTURËS DHE ENERGJISË DHE BASHKIMIT TË OPERATORËVE EKONOMIKË “AGBES CONSTRUCION”, SH.P.K., “BESTA”, SH.P.K., “PREMIUM CONSTRUCTION & MAINTENANCE”, SH.P.K., “ITE GRUP”, SH.P.K. DHE “ARKONSTUDIO”, SH.P.K.

Në mbështetje të nenit 100 të Kushtetutës dhe të nenit 26, të ligjit nr.125/2013, “Për koncesionet dhe partneritetin publik privat”, të ndryshuar, me propozimin e ministrit të Infrastrukturës dhe Energjisë, Këshilli i Ministrave

V E N D O S I:

1. Miratimin e kontratës së koncesionit/partneritet publik privat, për projektimin, ndërtimin dhe mirëmbajtjen e “Portit të integruar” në Triport Vlorë, ndërmjet Ministrisë së Infrastrukturës dhe Energjisë dhe bashkimit të operatorëve ekonomikë “Agbes Construcion”, sh.p.k., “Besta”, sh.p.k., “Premium Construction & Maintenance”, sh.p.k., “ITE Grup”, sh.p.k. dhe “ArkonStudio”, sh.p.k.

2. Ngarkohet Ministria e Infrastrukturës dhe Energjisë për zbatimin e këtij vendimi.

Ky vendim hyn në fuqi pas botimit në “Fletoren zyrtare”.

K R Y E M I N I S T R I
EDI RAMA

***

V E N D I M
PËR

PËRCAKTIMIN E RREGULLAVE TË HOLLËSISHME PËR ORGANIZIMIN, FUNKSIONIMIN, PËRBËRJEN, KRITERET DHE PROCEDURËN E PËRZGJEDHJES, SI DHE SHPËRBLIMIN E ANËTARËVE TË KËSHILLIT TË START UP-EVE

Në mbështetje të nenit 100 të Kushtetutës dhe të pikës 4, të nenit 8, të ligjit nr.25/2022, “Për mbështetjen dhe zhvillimin e start up-eve”, me propozimin e ministrit të Shtetit për Mbrojtjen e Sipërmarrjes, Këshilli i Ministrave

V E N D O S I:

I. DISPOZITA TË PËRGJITHSHME

1. Objekt i këtij vendimi është përcaktimi i rregullave të organizimit e funksionimit të Këshillit të Start up-eve pranë ministrit përgjegjës për sipërmarrjen, përcaktimi i kritereve, procedurës së përzgjedhjes dhe rasteve të mbarimit të mandatit dhe të shkarkimit të anëtarëve, si dhe të masës së shpërblimit financiar të anëtarëve.

2. Këshilli i Start up-eve ngrihet pranë ministrit përgjegjës për sipërmarrjen dhe ushtron detyrat dhe kompetencat në nxitjen e zhvillimit të start up-eve, në përputhje me ligjin nr.25/2022, “Për mbështetjen dhe zhvillimin e start up-eve”, dhe me dispozitat e këtij vendimi.

II. PËRBËRJA E KËSHILLIT TË START UP-EVE, KRITERET DHE PROCEDURA E PËRZGJEDHJES SË ANËTARËVE

3. Këshilli i Start up-eve kryesohet nga ministri përgjegjës për sipërmarrjen dhe përbëhet nga 5 (pesë) anëtarë të tjerë të zgjedhur nga institucione të lidhura me shërbimet e ofruara për biznesin dhe start up-et me mandat për një periudhë 1-vjeçare, me të drejtë rizgjedhjeje, si më poshtë vijon:

a) Një anëtar i caktuar nga Ministria e Financave dhe Ekonomisë, i cili mbulon fushën e sipërmarrjes;
b) Një anëtar i caktuar nga Agjencia Shqiptare e Zhvillimit të Investimeve (AIDA), i cili mbulon fushën e sipërmarrjes dhe inovacionit;
c) Një anëtar i caktuar nga Agjencia Kombëtare e Shoqërisë së Informacionit, i cili mbulon fushën e start up-eve dhe inovacionit (AKSHI);
ç) Një anëtar i caktuar nga Drejtoria e Përgjithshme e Pronësisë Industriale (DPPI);
d) Një anëtar i caktuar nga GIZ Albania, i cili mbulon zhvillimin dhe promovimin e start up-eve dhe të ekosistemit.

4. Mandati i anëtarit të Këshillit të Start up-eve përfundon në rastet e mëposhtme:

a) Dorëheqje;
b) Përfundim i mandatit të qëndrimit në detyrë;
c) Mbushje e moshës së pensionit të pleqërisë;
ç) Shkarkim;
d) Vdekje e anëtarit.

5. Anëtari i Këshillit të start up-eve shkarkohet nga detyra në rastet e mëposhtme:

a) Ndërprerje e marrëdhënies së punës me institucionin që përfaqëson;
b) Dënim me vendim penal të formës së prerë;
c) Kur bëhet i paaftë mendërisht ose fizikisht për të ushtruar detyrën;
ç) Mospjesëmarrje në mbledhjet e Këshillit të Start up-eve për më shumë se 1 (një) herë;
d) Kur, me veprimet e tij, dëmton veprimtarinë e Këshillit të Start up-eve dhe imazhin e institucionit që përfaqëson dhe të institucionit përgjegjës për funksionimin e Këshillit.

6. Në rast vakance në pozicionin e anëtarit të Këshillit të Start up-eve, ministri përgjegjës për sipërmarrjen, brenda 10 (dhjetë) ditëve nga konstatimi i vakancës, njofton institucionin përkatës për propozimin e anëtarit të ri.

Institucioni propozues duhet të zgjedhë anëtarin e ri brenda 10 (dhjetë) ditëve nga marrja e njoftimit të ministrit.

III. ORGANIZIMI DHE FUNKSIONIMI I KËSHILLIT TË START UP-EVE

7. Këshilli i Start up-eve mblidhet, si rregull, çdo 4 (katër) muaj, si dhe sa herë që kërkohet nga kryetari, sipas nevojave të veprimtarisë në fushën e mbështetjes së start up-eve.

8. Mbledhja e Këshillit të Start up-eve është e vlefshme nëse në të janë të pranishëm, të paktën, 5 (pesë) anëtarë.

9. Mbledhja e Këshillit të start up-eve drejtohet nga kryetari.

10. Këshilli i Start up-eve, gjatë ushtrimit të veprimtarisë së tij, asistohet nga sekretariati teknik, i përbërë nga 2 (dy) anëtarë të kabinetit të ministrit përgjegjës për sipërmarrjen.

IV. KOMPETENCAT E KËSHILLIT TË START UP-EVE

11. Këshilli i start up-eve ushtron këto kompetenca:

a) Jep kontribut nëpërmjet diskutimit dhe dhënies së mendimeve për politikat ekzistuese në nxitjen e zhvillimit të start up-eve dhe ekosistemit;
b) Dialogon dhe shkëmben pikëpamje për rritjen e ndërgjegjësimit publik për fushën e veprimtarisë së start up-eve, si objektiv i këtij këshilli;
c) Identifikon dhe analizon pengesat kryesore në zhvillimin e start up-eve, sipas sektorëve të ndryshëm të ekonomisë dhe ofron zgjidhje për reduktimin e këtyre pengesave;
ç) Analizon dhe përzgjedh praktikat më të mira kombëtare, rajonale dhe ndërkombëtare, të cilat do të rekomandohen për zbatim në procesin e përmirësimit dhe zhvillimit të ekosistemit të start up-eve;
d) Lehtëson bashkëpunimin “triple helix” nëpërmjet dialogut konstruktiv dhe shkëmbimit të pikëpamjeve ndërmjet qeverisë, biznesit (start up) dhe akademisë;
dh) Diskuton dhe konsulton çështje të tjera sipas rendit të ditës ose sipas propozimit të kryetarit;
e) Diskuton prioritete të përgjithshme të fushës së mbështetjes së start up-eve dhe ekosistemit të start up-eve në Shqipëri, parashikuar në shkronjën “e”, të nenit 14, të ligjit nr.25/2022, “Për mbështetjen dhe zhvillimin e start up-eve”.

12. Në varësi të çështjeve që do të diskutohen, në mbledhjet e Këshillit të Start up-eve ftohen pjesëmarrës nga ekosistemi i start up-eve, për të dëgjuar diskutimet e anëtarëve të Këshillit të Start Up-eve.

V. MASA E SHPËRBLIMIT

13. Shpërblimi i kryetarit dhe e anëtarëve të Këshillit është në masën 10 000 (dhjetë mijë) lekë për mbledhje, por jo më shumë se 12 (dymbëdhjetë) pagesa në vit.

14. Anëtari i GIZ Albania-s përjashtohet nga masa e shpërblimit të parashikuar në pikën 13, të këtij vendimi.

15. Shpenzimet për shpërblimin e kryetarit dhe të anëtarëve të Këshillit të Start up-eve vërtetohen kundrejt dokumentit të pjesëmarrjes në mbledhje.

VI. DISPOZITA TË FUNDIT

16. Funksionimi i Këshillit të Start up-eve u nënshtrohet rregullave të parashikuara në legjislacionin për organet kolegjiale të administratës shtetërore, për çështjet që nuk janë të rregulluara posaçërisht në këtë vendim.

17. Ngarkohen ministri përgjegjës për sipërmarrjen dhe institucionet e listuara në pikën 3 për zbatimin e këtij vendimi.

Ky vendim hyn në fuqi pas botimit në “Fletoren zyrtare”.

K R Y E M I N I S T R I
EDI RAMA

***

V E N D I M
PËR

MIRATIMIN E MARRËVESHJES, NDËRMJET KËSHILLIT TË MINISTRAVE TË REPUBLIKËS SË SHQIPËRISË DHE QEVERISË SË MBRETËRISË SË ARABISË SAUDITE, PËR NJOHJEN E NDËRSJELLË TË LEJEVE TË DREJTIMIT

Në mbështetje të nenit 100 të Kushtetutës dhe të nenit 19, të ligjit nr.43/2016, “Për marrëveshjet ndërkombëtare në Republikën e Shqipërisë”, me propozimin e ministrit të Infrastrukturës dhe Energjisë, Këshilli i Ministrave

V E N D O S I:

Miratimin e marrëveshjes, ndërmjet Këshillit të Ministrave të Republikës së Shqipërisë dhe qeverisë së Mbretërisë së Arabisë Saudite, për njohjen e ndërsjellë të lejeve të drejtimit, sipas tekstit që i bashkëlidhet këtij vendimi.

Ky vendim hyn në fuqi pas botimit në “Fletoren zyrtare”.

K R Y E M I N I S T R I
EDI RAMA

***

V E N D I M
PËR

MIRATIMIN, NË PARIM, TË MARRËVESHJES NDRYSHUESE TË MARRËVESHJES SË HUAS, NDËRMJET REPUBLIKËS SË SHQIPËRISË, TË PËRFAQËSUAR NGA MINISTRIA E FINANCAVE (HUAMARRËSI) DHE KORPORATA ELEKTROENERGJETIKE SHQIPTARE, SH.A. (AGJENCIA ZBATUESE E PROJEKTIT), DHE KFW FRANKFURT AM MAIN (KFW), PËR PROGRAMIN “ENERGJI UJORE DHE SIGURIA E DIGAVE NË KASKADËN E DRINIT”, RATIFIKUAR ME LIGJIN NR. 85/2015

Në mbështetje të nenit 100 të Kushtetutës dhe të neneve 10 e 23, të ligjit nr.43/2016, “Për marrëveshjet ndërkombëtare në Republikën e Shqipërisë”, me propozimin e ministrit të Infrastrukturës dhe Energjisë dhe të ministrit të Financave dhe Ekonomisë, Këshilli i Ministrave

V E N D O S I:

Miratimin, në parim, të marrëveshjes ndryshuese të marrëveshjes së huas, ndërmjet Republikës së Shqipërisë, të përfaqësuar nga Ministria e Financave (huamarrësi) dhe Korporata Elektroenergjetike Shqiptare, sh.a. (agjencia zbatuese e projektit), dhe KFW Frankfurt am Main (KfW), për programin “Energji ujore dhe siguria e digave në kaskadën e Drinit”, ratifikuar me ligjin nr.85/2015, sipas tekstit që bashkëlidhet këtij vendimi.

Ky vendim hyn në fuqi menjëherë.

K R Y E M I N I S T R I
EDI RAMA

***

V E N D I M
PËR

MIRATIMIN, NË PARIM, TË MARRËVESHJES NDRYSHUESE TË MARRËVESHJES ISTISNA’A DHE TË MARRËVESHJES NDRYSHUESE TË MARRËVESHJES SË AGJENCISË ISTISNA’A, NDËRMJET KËSHILLIT TË MINISTRAVE TË REPUBLIKËS SË SHQIPËRISË DHE BANKËS ISLAMIKE PËR ZHVILLIM, PËR NDËRTIMIN E SEGMENTIT QUKËS – QAFË PLLOÇË, SI PJESË E KORRIDORIT RRUGOR TIRANË – KORÇË, RATIFIKUAR ME LIGJIN NR.128/2013

Në mbështetje të nenit 100 të Kushtetutës dhe të neneve 10 e 23, të ligjit nr.43/2016, “Për marrëveshjet ndërkombëtare në Republikën e Shqipërisë”, me propozimin e ministrit të Infrastrukturës dhe Energjisë dhe të ministrit të Financave dhe Ekonomisë, Këshilli i Ministrave

V E N D O S I:

Miratimin, në parim, të marrëveshjes ndryshuese të marrëveshjes Istisna’a dhe të marrëveshjes ndryshuese të marrëveshjes së Agjencisë Istisna’a, ndërmjet Këshillit të Ministrave të Republikës së Shqipërisë dhe Bankës Islamike për Zhvillim, për ndërtimin e segmentit Qukës – Qafë Plloçë, si pjesë e korridorit rrugor Tiranë – Korçë, ratifikuar me ligjin nr.128/2013, sipas teksteve që i bashkëlidhen këtij vendimi.

Ky vendim hyn në fuqi menjëherë.

K R Y E M I N I S T R I
EDI RAMA

***

V E N D I M
PËR

MIRATIMIN, NË PARIM, TË MARRËVESHJES, NDËRMJET KËSHILLIT TË MINISTRAVE TË REPUBLIKËS SË SHQIPËRISË DHE QEVERISË SË REPUBLIKËS SË SLLOVAKISË, PËR ELIMINIMIN E TATIMIT TË DYFISHTË NË LIDHJE ME TATIMET MBI TË ARDHURAT DHE PARANDALIMIN DHE SHMANGIEN E EVAZIONIT TATIMOR

Në mbështetje të nenit 100 të Kushtetutës dhe të nenit 10, të ligjit nr.43/2016, “Për marrëveshjet ndërkombëtare në Republikën e Shqipërisë”, me propozimin e ministrit të Financave dhe Ekonomisë, Këshilli i Ministrave

V E N D O S I:

Miratimin, në parim, të marrëveshjes, ndërmjet Këshillit të Ministrave të Republikës së Shqipërisë dhe qeverisë së Republikës së Sllovakisë, për eliminimin e tatimit të dyfishtë në lidhje me tatimet mbi të ardhurat dhe parandalimin dhe shmangien e evazionit tatimor, sipas tekstit që i bashkëlidhet këtij vendimi.

Ky vendim hyn në fuqi menjëherë.

K R Y E M I N I S T R I
EDI RAMA

***

V E N D I M
PËR

CAKTIMIN E MINISTRISË SË BUJQËSISË DHE ZHVILLIMIT RURAL SI ORGAN PËRGJEGJËS PËR REALIZIMIN E PROCEDURËS SË DERATIZIMIT TË BIMËS SË GËSHTENJËS, ME QËLLIM MBROJTJEN E SAJ NGA PARAZITI GRERËZA GALEFORMUESE (DRYOCOSMUS KURIPHILUS HYMENOPTERA: CYNIPIDAE)

Në mbështetje të nenit 100 të Kushtetutës, të pikës 2, të nenit 5, të ligjit nr.90/2012, “Për organizimin dhe funksionimin e administratës shtetërore”, të ligjit nr.9936, datë 26.6.2008, “Për menaxhimin e sistemit buxhetor në Republikën e Shqipërisë”, të ligjit nr.115/2021, “Për buxhetin e vitit 2022”, të ndryshuar, të ligjit nr.105/2016, “Për mbrojtjen e bimëve”, dhe të ligjit nr.57/2020, “Për pyjet”, me propozimin e ministrit të Bujqësisë dhe Zhvillimit Rural dhe ministrit të Turizmit dhe Mjedisit, Këshilli i Ministrave

V E N D O S I:

1. Caktimin e Ministrisë së Bujqësisë dhe Zhvillimit Rural si organ përgjegjës për realizimin e procedurës së deratizimit të bimës së gështenjës, me qëllim mbrojtjen e saj nga paraziti grerëza Galeformuese (Dryocosmus Kuriphilus Hymenoptera: Cynipidae).

2. Ministria e Bujqësisë dhe Zhvillimit Rural ngarkohet për kryerjen e prokurimit dhe lidhjen e kontratës për kryerjen e shërbimit, sipas pikës 1, të këtij vendimi, si dhe monitorimin e zbatimit të kontratës.

3. Ministria e Turizmit dhe Mjedisit dhe Agjencia Kombëtare e Pyjeve (AKP), në bashkëpunim me Ministrinë e Bujqësisë dhe Zhvillimit Rural dhe njësitë e vetëqeverisjes vendore/bashkitë, të monitorojnë respektimin e kërkesave teknike trajtuese, të vendosura në zbatim të këtij procesi.

4. Fondi për procedurën e prokurimit publik të përballohet nga buxheti i miratuar, për vitin 2022, për Ministrinë e Bujqësisë dhe Zhvillimit Rural, shpenzimet korrente në programin buxhetor “Siguria ushqimore dhe mbrojtja e konsumatorit”, produkti “Sipërfaqe e trajtuar dhe e mbrojtur nga parazitët në fushën e bujqësisë”.

5. Ngarkohen Ministria e Bujqësisë dhe Zhvillimit Rural, Ministria e Turizmit dhe Mjedisit, Agjencia Kombëtare e Pyjeve (AKP), si dhe njësitë e vetëqeverisjes vendore/bashkitë për zbatimin e këtij vendimi.

Ky vendim hyn në fuqi pas botimit në “Fletoren zyrtare”.

K R Y E M I N I S T R I
EDI RAMA

***

V E N D I M
PËR

MIRATIMIN, NË PARIM, TË MEMORANDUMIT TË MIRËKUPTIMIT, NDËRMJET KËSHILLIT TË MINISTRAVE TË REPUBLIKËS SË SHQIPËRISË, TË PËRFAQËSUAR NGA MINISTRIA E BRENDSHME E REPUBLIKËS SË SHQIPËRISË, DHE QEVERISË SË MBRETËRISË SË BASHKUAR TË BRITANISË SË MADHE DHE IRLANDËS SË VERIUT, TË PËRFAQËSUAR NGA MINISTRIA E PUNËVE TË BRENDSHME, PËR SHKËMBIMIN E INFORMACIONIT PËR QËLLIME TË LIDHURA ME MIGRACIONIN

Në mbështetje të nenit 100 të Kushtetutës dhe të nenit 10, të ligjit nr.43/2016, “Për marrëveshjet ndërkombëtare në Republikën e Shqipërisë”, me propozimin e ministrit të Brendshëm, Këshilli i Ministrave

V E N D O S I:

Miratimin, në parim, të memorandumit të mirëkuptimit ndërmjet Këshillit të Ministrave të Republikës së Shqipërisë, të përfaqësuar nga Ministria e Brendshme e Republikës së Shqipërisë dhe qeverisë së Mbretërisë së Bashkuar të Britanisë së Madhe dhe Irlandës së Veriut, të përfaqësuar nga Ministria e Punëve të Brendshme, për shkëmbimin e informacionit për qëllime të lidhura me migracionin, sipas tekstit që i bashkëlidhet këtij vendimi.

Ky vendim hyn në fuqi menjëherë.

K R Y E M I N I S T R I
EDI RAMA

***

V E N D I M
PËR

DISA NDRYSHIME NË VENDIMIN NR.613 DATË 27.10.2017, TË KËSHILLIT TË MINISTRAVE, “PËR MIRATIMIN E LISTËS SË INVENTARIT TË PRONAVE TË PALUAJTSHME SHTETËRORE, TË CILAT I KALOJNË NË PËRGJEGJËSI ADMINISTRIMI MINISTRISË SË BUJQËSISË DHE ZHVILLIMIT RURAL, PËR DREJTORINË E SHËRBIMEVE TË PESHKIMIT DHE AKUAKULTURËS”, TË NDRYSHUAR

Në mbështetje të nenit 100 të Kushtetutës dhe të neneve 8, pika 3, e 13, të ligjit nr.8743, datë 22.2.2001, “Për pronat e paluajtshme të shtetit”, të ndryshuar, me propozimin e ministrit të Bujqësisë dhe Zhvillimit Rural, Këshilli i Ministrave

V E N D O S I:

1. Në lidhjen 1, që i bashkëlidhet vendimit nr.613, datë 27.10.2017, të Këshillit të Ministrave, të ndryshuar, bëhen këto ndryshime:

a) Formulari për pronën, me emërtimin “Aset, Porti i Peshkimit Zogaj” zëvendësohet me formularin, planrilevimin dhe planimetritë, që i bashkëlidhen këtij vendimi dhe janë pjesë përbërëse të tij.
b) Në formularin për pronën, me emërtimin “Aset, Porti i Peshkimit Shëngjin”, pasuria “kabinë gjeneratori”, me numër rendor 5, zona kadastrale 3126, dhe sipërfaqe 10 m2, hiqet.

2. Ngarkohen Ministria e Bujqësisë dhe Zhvillimit Rural, Drejtoria e Shërbimeve të Peshkimit dhe Akuakulturës dhe Agjencia Shtetërore e Kadastrës për zbatimin e këtij vendimi.

Ky vendim hyn në fuqi pas botimit në “Fletoren zyrtare”.

K R Y E M I N I S T R I
EDI RAMA

***

V E N D I M
PËR

POLITIKAT KOMBËTARE PËR RIORGANIZIMIN E SEKTORIT TË FURNIZIMIT ME UJË DHE TË LARGIMIT, TRAJTIMIT DHE PËRPUNIMIT TË UJËRAVE TË NDOTURA

Në mbështetje të nenit 100 të Kushtetutës dhe të nenit 12, të ligjit nr.8102, datë 28.3.1996, “Për kuadrin rregullator të sektorit të furnizimit me ujë dhe të largimit dhe përpunimit të ujërave të ndotura”, të ndryshuar, me propozimin e ministrit të Infrastrukturës dhe Energjisë, Këshilli i Ministrave

V E N D O S I:

I. DISPOZITA TË PËRGJITHSHME

1. Qëllimi i riorganizimit të sektorit të furnizimit me ujë dhe të largimit, trajtimit dhe përpunimit të ujërave të ndotura është të përmirësojë sigurimin e furnizimit me ujë dhe të shërbimeve të kanalizimeve në të gjithë territorin e Republikës së Shqipërisë, duke plotësuar nevojat e një ekonomie në zhvillim, si dhe duke mbrojtur mjedisin, shëndetin e sigurinë e qytetarëve.

2. Shërbimet e furnizimit me ujë dhe kanalizimet duhet të jenë ekologjikisht, teknikisht dhe financiarisht të qëndrueshme përmes mbulimit të plotë të kostos.

3. Sektori i furnizimit me ujë dhe kanalizimet ofron qasje universale, që i plotëson të gjitha kërkesat rregullatore/evropiane, sipas parimit “ndotësi paguan”.

4. Shoqëritë e furnizimit me ujë dhe kanalizimet të kenë efikasitet dhe performancë të cilësisë së shërbimit të barabartë me praktikën e mirë evropiane.

5. Ofrimi i shërbimeve të furnizimit me ujë dhe kanalizimeve për konsumatorët të sigurohet me një çmim të përballueshëm.

6. Të sigurohet pjesëmarrja e publikut dhe transparenca në politikat e ujit.

7. Për të realizuar krijimin e një sektori të furnizimit me ujë sipas standardeve evropiane vlerësohet krijimi i subjekteve me kompetenca të përbashkëta, në përputhje me legjislacionin në fuqi dhe sipas hartës së shoqërive UK të reja, të përcaktuar në lidhjen nr.4, që i bashkëlidhet këtij vendimi.

II. RIORGANIZIMI I SEKTORIT TË FURNIZIMIT ME UJË DHE TË LARGIMIT, TRAJTIMIT DHE PËRPUNIMIT TË UJËRAVE TË NDOTURA

1. Për kryerjen e funksioneve në dobi të përbashkët dhe përmirësimin e cilësisë të shërbimeve të ofruara në sektorin e furnizimit me ujë, si dhe largimit, trajtimit e përpunimit të ujërave të ndotura, dy ose më shumë njësi të vetëqeverisjes vendore, brenda një qarku apo midis qarqeve të ndryshme, në përputhje me legjislacionin në fuqi për organizimin dhe funksionimin e njësive të vetëqeverisjes vendore, mund të lidhin marrëveshje bashkëpunimi ndërmjet tyre dhe me ministrinë përgjegjëse për infrastrukturën dhe energjinë për riorganizimin e shoqërive aksionare ekzistuese të ujësjellës-kanalizimeve.

2. Njësitë e vetëqeverisjes vendore që bien dakord për riorganizimin e shoqërive aksionare të ujësjellës-kanalizimeve, që ushtrojnë veprimtarinë brenda kufijve të juridiksionit territorial të tyre, nënshkruajnë marrëveshjen e bashkëpunimit me ministrinë përgjegjëse për infrastrukturën dhe energjinë, sipas formatit tip të përcaktuar në lidhjen nr.1, që i bashkëlidhet këtij vendimi.

3. Shoqëritë aksionare ekzistuese të ujësjellës-kanalizimeve, pas nënshkrimit dhe hyrjes në fuqi të marrëveshjes së bashkëpunimit, sipas përcaktimit të pikave 1 dhe 2, të këtij vendimi, riorganizohen si subjekte me kompetenca të përbashkëta (në vijim, SKP), të cilat janë shoqëri të reja aksionare të krijuara sipas sistemit të administrimit me dy nivele, në përputhje me formatin e statutin tip, të përcaktuar në lidhjen nr.2, që i bashkëlidhet këtij vendimi, si dhe legjislacionin në fuqi për tregtarët dhe shoqëritë tregtare. Në momentin e krijimit, SKP-së i transferohen të gjitha të drejtat, detyrimet, si dhe veprimtaria ekonomike e shoqërive aksionare ekzistuese të ujësjellës-kanalizimeve, në pronësi të njësive të vetëqeverisjes vendore.

4. Riorganizimi i SKP-ve, sipas pikave 1 dhe 2, të këtij kreu, fillon në vitin 2022 dhe përfundon sipas një programi të bashkërenduar ndërmjet njësive të vetëqeverisjes vendore dhe Ministrisë së Infrastrukturës dhe Energjisë, të miratuar nga Këshilli i Ministrave.

5. Marrëveshja hyn në fuqi pasi është nënshkruar rregullisht nga palët dhe është marrë shprehja e ligjshmërisë së marrëveshjes nga ana e prefektit të qarkut/prefektëve të qarqeve, sipas kërkesave të nenit 14, të ligjit nr.139/2015, “Për vetëqeverisjen vendore”, të ndryshuar.

6. Kur njësitë e vetëqeverisjes vendore vendosin për të krijuar shoqërinë aksionare me aksionar edhe ministrinë përgjegjëse për infrastrukturën dhe energjinë, ministria zotëron jo më pak se 51 (pesëdhjetë e një) % të aksioneve me të drejta vote. Njësitë e vetëqeverisjes vendore, të cilat kanë lidhur marrëveshje për riorganizimin e shoqërive aksionare ekzistuese të ujësjellës-kanalizimeve në pronësi të tyre, zotërojnë bashkërisht jo më shumë se 49 (dyzet e nëntë) % të aksioneve me të drejta vote të SKP-së së krijuar rishtazi, në përpjesëtim me numrin total të abonentëve aktivë, që kanë shoqëritë aksionare ekzistuese në pronësi të tyre në momentin e nënshkrimit dhe të hyrjes në fuqi të marrëveshjes për krijimin e SKP-së.

7. Kapitali themeltar për secilën nga SKP-të e krijuara është jo më i vogël se 10 000 000 (dhjetë milionë) lekë. Shlyerja e vlerës së kapitalit të nënshkruar të bëhet sipas marrëveshjes të nënshkruar nga secila prej palëve, në përputhje me statutin, legjislacionin në fuqi për tregtarët dhe shoqëritë tregtare, si dhe përqindjen e aksioneve që do të zotërohen prej tyre, sipas parashikimit të dhënë në pikën 6, të këtij vendimi.

8. Pas themelimit të SKP-ve të krijuara nga riorganizmi, vijohet me transferimin e plotë të veprimtarisë, që aktualisht ushtrohet nga shoqëri publike të ujësjellës-kanalizimeve (transferuesit) te SKP-të e krijuara (marrësit e transferimit). Transferimi i veprimtarisë do të bazohet mbi një kontratë (akt transferimi) të noterizuar, sipas lidhjes nr.3, që i bashkëlidhet këtij vendimi, e cili do të nënshkruhet rregullisht ndërmjet palëve (transferuesve dhe marrësit të transferimit) dhe do të regjistrohet në pasqyrat financiare të shoqërive.

9. Shlyerja e vlerës nominale të aksioneve, që do të zotërohen nga Ministria e Infrastrukturës dhe Energjisë, të kryhet duke njohur investimet në proces, të cilat janë financuar nga buxheti i shtetit dhe me anë të investimeve kapitale të ardhshme që qeveria do të ndërmarrë në vitet në vijim në gjithsecilën prej këtyre shoqërive ose nëpërmjet shuarjes me kompensim të detyrimeve që shoqëritë e ujësjellës-kanalizimeve kanë në momentin e nënshkrimit të marrëveshjes ndaj institucioneve të tjera qendrore buxhetore dhe jobuxhetore.

10. Shlyerja e kontributeve nga ministria përgjegjëse për infrastrukturën mund të realizohet edhe nëpërmjet të drejtave të vlerësueshme në para, të tilla si kompensimi i vlerës së detyrimeve që shoqëritë aksionare ekzistuese të ujësjellës-kanalizimeve kanë në momentin e nënshkrimit të marrëveshjes për krijimin e SKP-së. Aksionarët do të nënshkruajnë kontratë rritjeje kapitali, që investimet e ardhshme dhe fitimi të kapitalizohen e të alokohen derisa të arrijnë përqindjen sipas marrëveshjes së krijimit të SKP-së.

11. SKP-të e krijuara nëpërmjet marrëveshjeve të bashkëpunimit të parashikuara në pikat 1 e 2, të këtij vendimi, respektojnë dhe zbatojnë kontratat e shërbimit të lidhura para krijimit të tyre, detyrimet kontraktore që burojnë nga marrëveshjet e lidhura nga Këshilli i Ministrave, ministritë e linjës dhe institucionet qendrore, si dhe detyrimet kontraktore nga marrëveshjet e lidhura ndërmjet ish-njësive të vetëqeverisjes vendore dhe institucioneve financiare ndërkombëtare ose shoqërive kontraktuese përkatëse.

12. Ministria përgjegjëse për infrastrukturën dhe energjinë u akordon SKP-ve, të krijuara në kuadër të riorganizimit me marrëveshje të subjekteve që ofrojnë shërbimin e furnizimit me ujë të pijshëm, grumbullimit, largimit dhe trajtimit të ujërave të ndotura në Republikën e Shqipërisë, fondet e planifikuara për investime nga buxheti i shtetit apo nga institucionet financiare ndërkombëtare, në përputhje me parashikimet e dokumenteve strategjike sektoriale në fuqi.

13. SKP-të e krijuara nëpërmjet marrëveshjeve të bashkëpunimit, të parashikuara në pikat 1 e 2, të këtij vendimi, brenda 3 (tre) muajve nga shprehja e ligjshmërisë nga prefekti i qarkut dhe përfundimi i procesit të plotë të transferimit, paraqesin kërkesë pranë Entit Rregullator të Ujit (ERRU) për pajisjen me licencë, sipas kategorisë përkatëse të shërbimit të ofruar dhe rishikimin e tarifave ekzistuese.

14. Njësitë e vetëqeverisjes vendore, të cilat, me vullnet të lirë, lidhin marrëveshje bashkëpunimi me ministrinë përgjegjëse për infrastrukturën dhe energjinë, sipas pikës 1, të këtij vendimi, marrin masa për transferimin e plotë të veprimtarisë ekonomike të shoqërive aksionare ekzistuese te SKP-ja e krijuar me marrëveshje, në përputhje me legjislacionin në fuqi për tatimin mbi vlerën e shtuar dhe planin kombëtar të hartuar nga Agjencia Kombëtare e Ujësjellës-Kanalizimeve dhe Infrastrukturës së Mbetjeve për riorganizimin e shoqërive ujësjellës-kanalizime. Transferimi i veprimtarisë së parashikuar në këtë pikë bëhet me akt noterial, sipas formatit të parashikuar në lidhjen nr.3, që i bashkëlidhet këtij vendimi, i cili, pas nënshkrimit nga shoqëritë përkatëse, bëhet pjesë e pasqyrave financiare dhe mbahet nga pala që i ka kaluar transferimi.

III. DISPOZITA TË FUNDIT

1. Efektet financiare, që rrjedhin nga zbatimi i këtij vendimi, përfshirë shpenzimet për transferimin e plotë të veprimtarisë te SKP-ja e krijuar rishtazi dhe shpenzimet për themelimin e SKP-ve përballohen nga buxheti i shtetit.

2. Ngarkohen Ministria e Infrastrukturës dhe Energjisë, Enti Rregullator i Ujit, Agjencia Kombëtare e Ujësjellës-Kanalizimeve dhe Infrastrukturës së Mbetjeve, si dhe njësitë e vetëqeverisjes vendore për zbatimin e këtij vendimi.

Ky vendim hyn në fuqi pas botimit në “Fletoren zyrtare”.

K R Y E M I N I S T R I
EDI RAMA

***

V E N D I M
PËR

MIRATIMIN E REKOMANDIMEVE PRIORITARE NË LUFTËN KUNDËR KRIMINALITETIT, PËR VITIN 2022

Në mbështetje të nenit 100 të Kushtetutës, të nenit 103, të ligjit nr.97/2016, “Për organizimin dhe funksionimin e prokurorisë në Republikën e Shqipërisë”, dhe të pikës 32, të nenit 6, të ligjit nr.8678, datë 14.5.2001, “Për organizimin dhe funksionimin e Ministrisë së Drejtësisë”, të ndryshuar, me propozimin e ministrit të Drejtësisë, Këshilli i Ministrave

V E N D O S I:

1. Miratimin e rekomandimeve prioritare në luftën kundër kriminalitetit, për vitin 2022, sipas tekstit, që i bashkëlidhet këtij vendimi dhe është pjesë përbërëse e tij.

2. Ngarkohet ministri i Drejtësisë t’ia përcjellë menjëherë rekomandimet prioritare Prokurorit të Përgjithshëm, si dhe t’ua bëjë ato të njohura drejtuesve të prokurorive të të gjitha shkallëve dhe drejtuesit të Prokurorisë së Posaçme, në një mbledhje të përbashkët, jo më vonë se 1 (një) muaj nga data e miratimit të këtij vendimi.

3. Ngarkohet ministri i Drejtësisë të ndjekë, në vazhdimësi, mënyrën e zbatimit të këtyre rekomandimeve, sipas legjislacionit në fuqi.

Ky vendim hyn në fuqi menjëherë dhe botohet në “Fletoren zyrtare”.

K R Y E M I N I S T R I
EDI RAMA

***

V E N D I M
PËR

RISHPËRNDARJE FONDESH NË BUXHETIN E VITIT 2022, MIRATUAR PËR MINISTRINË E ARSIMIT DHE SPORTIT

Në mbështetje të nenit 100 të Kushtetutës, të nenit 44, të ligjit nr.9936, datë 26.6.2008, “Për menaxhimin e sistemit buxhetor në Republikën e Shqipërisë”, të ndryshuar, dhe të nenit 17, të ligjit nr.115/2021, “Për buxhetin e vitit 2022”, të ndryshuar, me propozimin e ministrit të Arsimit dhe Sportit, Këshilli i Ministrave

V E N D O S I:

1. Nga fondet e miratuara për Ministrinë e Arsimit dhe Sportit, në programin buxhetor “Arsimi bazë” 09120, në zërin “Shpenzime kapitale me financim të brendshëm”, shuma prej 168 000 000 (njëqind e gjashtëdhjetë e tetë milionë) lekësh, të rishpërndahet për mbulimin e shpenzimeve për tatimin mbi vlerën e shtuar për pajisjet e furnizuara për objektet arsimore, të ndërtuara në kuadër të programit të rindërtimit EU4schools, në vitin 2021, në zbatim të marrëveshjes së bashkëpunimit, me shkëmbim notash, ndërmjet Këshillit të Ministrave të Republikës së Shqipërisë dhe Bashkimit Evropian, për programin “EU4schools”, me përfitues njësitë e vetëqeverisjes vendore.

2. Ministria e Arsimit dhe Sportit dhe Ministria e Financave dhe Ekonomisë të realizojnë rishpërndarjen e fondeve për llogari të njësive të vetëqeverisjes vendore, pas paraqitjes prej tyre të kërkesës për rimbursimin e tatimit mbi vlerën e shtuar, si dhe dokumentacionit shoqërues të mallrave të blera në kuadër të programit “EU4schools”, në vitin 2021, kopjeve të kontratës/ave të nënshkruara, kopjeve të faturave tatimore, të lëshuara nga kontraktori/ët, aktet e marrjes në dorëzim të mallit/mallrave dhe fletëhyrjes së pajisjeve të furnizuara.

3. Ngarkohen Ministria e Arsimit dhe Sportit, Ministria e Financave dhe Ekonomisë dhe njësitë e vetëqeverisjes vendore për zbatimin e këtij vendimi.

Ky vendim hyn në fuqi pas botimit në “Fletoren zyrtare”.

K R Y E M I N I S T R I
EDI RAMA

***

V E N D I M
PËR

RISHPËRNDARJEN E NUMRIT TË PUNONJËSVE ORGANIKË DHE TË FONDEVE BUXHETORE NË NJËSITË E QEVERISJES QENDRORE, PËR VITIN 2022

Në mbështetje të nenit 100 të Kushtetutës dhe të neneve 12 e 17, të ligjit nr.115/2021, “Për buxhetin e vitit 2022”, të ndryshuar, dhe të nenit 44, të ligjit nr.9936, datë 26.6.2008, “Për menaxhimin e sistemit buxhetor në Republikën e Shqipërisë”, me propozimin e ministrit të Financave dhe Ekonomisë, Këshilli i Ministrave

V E N D O S I:

1. Numri i punonjësve i Ministrisë për Evropën dhe Punët e Jashtme, për vitin 2022, reduktohet me 15 (pesëmbëdhjetë) punonjës, duke e çuar numrin e përgjithshëm të ministrisë në 584 (pesëqind e tetëdhjetë e katër) punonjës.

2. Numri i punonjësve i Ministrisë së Arsimit dhe Sportit, për vitin 2022, shtohet me 15 (pesëmbëdhjetë) punonjës, duke e çuar numrin e përgjithshëm të ministrisë në 31 005 (tridhjetë e një mijë e pesë) punonjës.

3. Në programin 01110 “Planifikim, menaxhim, administrim”, të miratuar për vitin 2022, për Ministrinë për Evropën dhe Punët e Jashtme, reduktohet fondi prej 31 764 180 (tridhjetë e një milionë e shtatëqind e gjashtëdhjetë e katër mijë e njëqind e tetëdhjetë) lekësh, në zërin “Shpenzime korrente” dhe fondi prej 5 500 000 (pesë milionë e pesëqind mijë) lekësh, në zërin “Shpenzime kapitale”.

4. Në programin 09120 “Arsimi bazë (përfshirë parashkollorin)”, të miratuar për vitin 2022, për Ministrinë e Arsimit dhe Sportit, shtohet fondi prej 31 764 180 (tridhjetë e një milionë e shtatëqind e gjashtëdhjetë e katër mijë e njëqind e tetëdhjetë) lekësh, në zërin “Shpenzime korrente”, dhe fondi prej 5 500 000 (pesë milionë e pesëqind mijë) lekësh, në zërin “Shpenzime kapitale”.

5. Ngarkohen Ministria për Evropën dhe Punët e Jashtme, Ministria e Arsimit dhe Sportit dhe Ministria e Financave dhe Ekonomisë për zbatimin e këtij vendimi.

Ky vendim hyn në fuqi menjëherë dhe botohet në “Fletoren zyrtare”.

K R Y E M I N I S T R I
EDI RAMA

***

V E N D I M
PËR

MIRATIMIN E RREGULLAVE TË HOLLËSISHME PËR PËRBËRJEN E KOMISIONIT TË VLERËSIMIT, SI DHE TË KRITEREVE, PROCEDURËS SË PËRZGJEDHJES DHE SHPËRBLIMIT TË ANËTARËVE TË TIJ

Në mbështetje të nenit 100 të Kushtetutës dhe të pikës 4, të nenit 14, të ligjit nr.25/2022, “Për mbështetjen dhe zhvillimin e start up-eve”, me propozimin e ministrit të Shtetit për Mbrojtjen e Sipërmarrjes, Këshilli i Ministrave

V E N D O S I:

I. DISPOZITA TË PËRGJITHSHME

1. Ngritjen e Komisionit të Vlerësimit të Dhënies së Granteve për Mbështetjen e start up-eve (në vijim, komisioni i vlerësimit), si organ vlerësues për kërkesat e start up-eve dhe lehtësuesve për mbështetje me grant.

2. Objekt i këtij vendimi është përcaktimi i rregullave të organizimit e funksionimit të komisionit të vlerësimit, përcaktimi i kritereve, procedurës së përzgjedhjes, rasteve të mbarimit të mandatit dhe të shkarkimit të anëtarëve, si dhe të masës së shpërblimit financiar të tyre.

II. PËRBËRJA E KOMISIONIT TË VLERËSIMIT

3. Komisioni i vlerësimit të dhënies së grantit për mbështetjen e start up-eve dhe lehtësuesve kryesohet nga ministri përgjegjës për sipërmarrjen dhe përbëhet nga 4 (katër) anëtarë të tjerë të zgjedhur me mandat për periudhën e disbursimit të grantit maj – dhjetor 2022, me të drejtë rizgjedhjeje,, si më poshtë vijon:

a) Një anëtar i caktuar nga ministri përgjegjës për sipërmarrjen;
b) Një anëtar i caktuar nga ministri përgjegjës për rininë dhe fëmijët;
c) Një anëtar i caktuar nga Fondacioni Shqiptaro-Amerikan për Zhvillim (Albanian–American Development Foundation), nga sektori i sipërmarrjes që mbulon tematikën e start up-eve dhe ekosistemit;
ç) Një anëtar ekspert nga ekosistemi i start up-eve.

4. Anëtari ekspert i ekosistemit, parashikuar në shkronjën “ç”, të pikës 3, të këtij vendimi, do të përzgjidhet mbi bazën e një procesi transparent konkurrimi, pas shpalljes së thirrjes për ekspertë të publikuar në faqen e ministrisë përgjegjëse për sipërmarrjen.

Ministri përgjegjës për sipërmarrjen ngarkohet të hartojë termat e referencës, afatin e aplikimit dhe kriteret e thirrjes për ekspert, si dhe të menaxhojnë procesin e konkurrimit e të përzgjedhjes së ekspertit të parashikuar shkronjën “ç”, të pikës 3, të këtij vendimi.

Ministri përgjegjës për sipërmarrjen shpall fitues 2 (dy) aplikantët e vlerësuar me pikët më të larta nga konkurrimi, fituesin e parë në cilësinë e anëtarit të komisionit të vlerësimit dhe fituesin e renditur i dyti në cilësinë e zëvendësuesit, në rastin e krijimit të vakancës nga eksperti i parë.

5. Mandati i anëtarit të komisionit të vlerësimit mbaron në rastet e mëposhtme:

a) Dorëheqje;
b) Përfundim i mandatit të qëndrimit në detyrë;
c) Mbushje e moshës së pensionit të pleqërisë;
ç) Shkarkim;
d) Vdekje e anëtarit.

6. Anëtari i komisionit të vlerësimit shkarkohet nga detyra në rastet e mëposhtme:

a) Ndërprerje e marrëdhënies së punës me institucionin që përfaqëson;
b) Dënim me vendim penal të formës së prerë;
c) Kur bëhet i paaftë mendërisht ose fizikisht për të ushtruar detyrën;
ç) Kur, me veprimet e tij, dëmton veprimtarinë e komisionit të vlerësimit dhe imazhin e institucionit përgjegjës për funksionimin e këtij komisioni.

7. Në rast vakance në pozicionin e anëtarit të komisionit të vlerësimit, ministri përgjegjës për sipërmarrjen njofton menjëherë institucionin përkatës për propozimin e anëtarit të ri.

Institucioni propozues duhet të zgjedhë dhe të komunikojë anëtarin e ri brenda 5 (pesë) ditëve nga njoftimi i ministrit.

Në rastin e vakancës së krijuar nga anëtari ekspert i ekosistemit, ministri përgjegjës për sipërmarrjen cakton anëtar të komisionit të vlerësimit fituesin e renditur i dyti, parashikuar në shkronjën “b”, të pikës 4, të këtij vendimi.

III. ORGANIZIMI I MBLEDHJEVE TË KOMISIONIT TË VLERËSIMIT

8. Komisioni i vlerësimit mblidhet jo më vonë se 5 (pesë) ditë pas mbylljes së thirrjes për aplikime nga start up-e dhe lehtësues të start up-eve.

9. Mbledhja e komisionit të vlerësimit është e vlefshme nëse në të janë të pranishëm të paktën 3 (tre) anëtarë.

10. Mbledhja e komisionit të vlerësimit drejtohet nga kryetari.

11. Vendimet merren me shumicë të anëtarëve të komisionit të vlerësimit të pranishëm në mbledhje. Në rastet kur rezultati i votimit është i barabartë, vota e kryetarit është vendimtare.

Procesverbali i mbledhjes u komunikohet të gjithë anëtarëve pjesëmarrës në mbledhje dhe nënshkruhet prej tyre.

12. Komisioni i vlerësimit ushtron detyrat e parashikuara në nenin 14, të ligjit nr.25/2022, “Për mbështetjen dhe zhvillimin e start up-eve”, dhe në aktin nënligjor të miratuar në zbatim të pikës 3, të tij.

IV. KOMPETENCAT E KOMISIONIT TË VLERËSIMIT

13. Komisioni i vlerësimit ushtron këto detyra dhe kompetenca:

a) Shqyrton dhe vlerëson të gjitha aplikimet e mbërritura nga start up-et dhe lehtësuesit;
b) Kërkon informacione ose dokumentacion shtesë nga aplikantët, atëherë kur gjykohet e domosdoshme për vendimmarrjen, nëpërmjet njësisë përgjegjëse për menaxhimin e grantit, pranë ministrit përgjegjës për sipërmarrjen;
c) Plotëson raportin vlerësues për çdo aplikim dhe anëtarët e tij japin pikët individuale;
ç) Miraton nivelin e grantit për përfituesit start up ose lehtësues të start up-eve, bazuar në pikëzimin dhe vendimmarrjen e anëtarëve të komisionit të vlerësimit;
d) Merr në shqyrtim rastet problematike të aplikimit, me kërkesë të njësisë përgjegjëse pranë ministrit përgjegjës për sipërmarrjen.

V. MASA E SHPËRBLIMIT

14. Shpërblimi i kryetarit dhe i anëtarëve të komisionit të vlerësimit është në masën 15 000 (pesëmbëdhjetë mijë) lekë për mbledhje, por jo më shumë se 12 (dymbëdhjetë) pagesa në vit.

15. Shpenzimet për shpërblimin e kryetarit dhe të anëtarëve vërtetohen kundrejt dokumentit të pjesëmarrjes në mbledhje.

VI. DISPOZITA TË FUNDIT

16. Ngarkohen institucionet e përmendura në pikën 3, të këtij vendimi, të caktojnë dhe të komunikojnë anëtarin e tyre pranë ministrit përgjegjës për sipërmarrjen, brenda 5 (pesë) ditëve nga hyrja në fuqi e këtij vendimi.

17. Funksionimi i komisionit të vlerësimit u nënshtrohet rregullave të parashikuara në legjislacionin për organet kolegjiale të administratës shtetërore për çështjet që nuk janë të rregulluara posaçërisht në këtë vendim.

18. Ngarkohen ministri përgjegjës për sipërmarrjen dhe institucionet e listuara në pikën 3 për zbatimin e këtij vendimi.

Ky vendim hyn në fuqi pas botimit në “Fletoren zyrtare”.

K R Y E M I N I S T R I
EDI RAMA

***

V E N D I M
PËR

PËRCAKTIMIN E RREGULLAVE TË HOLLËSISHME PËR RASTET DHE MËNYRËN E PËRDORIMIT TË ARMËVE, TË NDRYSHME NGA ARMËT E ZJARRIT, SI DHE TË PAJISJEVE KUFIZUESE NGA POLICIA E BURGJEVE

Në mbështetje të nenit 100 të Kushtetutës dhe të pikës 8, të nenit 14, të ligjit nr.80/2020, “Për Policinë e Burgjeve”, me propozimin e ministrit të Drejtësisë, Këshilli i Ministrave

V E N D O S I:

I. DISPOZITA TË PËRGJITHSHME

1. Objekt i këtij vendimi është përcaktimi i rregullave të hollësishme për rastet dhe mënyrën e përdorimit të armëve, të ndryshme nga armët e zjarrit, si dhe rastet dhe mënyrën e përdorimit të pajisjeve kufizuese nga Policia e Burgjeve.

2. Në kuptim të këtij vendimi, termat e mëposhtëm kanë këto kuptime:

a) “Armë”, çdo mjet ose vegël, sipas kuptimit dhe kategorizimit të parashikuar në legjislacionin në fuqi për armët, të ndryshme nga armët e zjarrit;
b) “Pajisje kufizuese”, çdo pajisje, e cila përdoret nga Policia e Burgjeve në ushtrim të detyrës, në situata të veçanta, për kufizimin e lëvizjes së të burgosurit apo neutralizimin e tij, me qëllim garantimin e rendit e të sigurisë.

II. RASTET DHE MËNYRAT E PËRDORIMIT TË ARMËVE DHE TË PAJISJEVE KUFIZUESE NGA POLICIA E BURGJEVE

1. Punonjësi i Policisë së Burgjeve ka të drejtë të mbajë armë dhe pajisje të tjera kufizuese, gjatë ushtrimit të detyrës dhe për shkak të saj, brenda orarit të shërbimit, vetëm në rastet e përcaktuara në legjislacionin në fuqi, si dhe në këtë vendim.

2. Punonjësi i Policisë së Burgjeve përdor pajisjet kufizuese, në kuadër të ushtrimit të detyrës, edhe me qëllim kufizimin e lëvizjes së të burgosurit.

3. Armët dhe pajisjet e tjera kufizuese përdoren vetëm nga punonjësit e Policisë së Burgjeve, që kanë përfunduar me sukses trajnimin e detyruar për përdorimin e mjeteve të forcës. Armët dhe pajisjet e tjera kufizuese nuk mund të përdoren në kundërshtim me udhëzimet e trajnimit të detyruar për përdorimin e mjeteve të forcës.

4. Në çdo rast, përdorimi i armëve nga punonjësi i Policisë së Burgjeve kryhet duke parandaluar çdolloj ndikimi në jetën dhe/ose shëndetin e personit ndaj të cilit përdoret forca. Në rastet kur është i pamundur parandalimi i ndikimit në shëndetin e personit ndaj të cilit përdoret forca, punonjësi i Policisë së Burgjeve duhet të sigurohet që, nëpërmjet veprimeve ose mosveprimeve të tij, shkaktohen vetëm ato dëmtime fizike ose shëndetësore, që janë të pashmangshme me qëllim parandalimin e neutralizimin e gjendjes, që ka diktuar përdorimin e armës.

5. Punonjësi i Policisë së Burgjeve përdor armën për të ushtruar të drejta apo për të përmbushur detyra të caktuara nga ligji ose nga një urdhër i dhënë nga eprori ose personi kompetent.

6. Policia e Burgjeve ka të drejtë të mbajë dhe të përdorë armë, si më poshtë vijon:

a) Armë me elektroshok;
b) Armë për përhapjen e gazeve irrituese;
c) Shkop gome;
ç) Shkop metalik.

7. Policia e Burgjeve ka të drejtë të mbajë dhe të përdorë pajisje kufizuese, si më poshtë vijon:

a) Pranga duarsh;
b) Pranga plastike;
c) Këmisha force;
ç) Rrip mesi kufizues;
d) Rrjeta izoluese.

8. Punonjësi i Policisë së Burgjeve, në përmbushje të detyrave funksionale, mund të përdorë armë në rastet e mëposhtme:

a) Kur i burgosuri ndërmerr veprime të drejtpërdrejta, me qëllim largimin nga vendi i qëndrimit të detyrueshëm ose gjatë transportimit të tij nga njëri vend në tjetrin;
b) Kur persona të tjerë ndërmarrin veprime të drejtpërdrejta, me qëllim krijimin e kushteve lehtësuese për largimin e të burgosurit nga vendi i qëndrimit të detyrueshëm ose gjatë transportimit të tij nga njëri vend në tjetrin;
c) Kur punonjësi i Policisë së Burgjeve, gjatë ose për shkak të detyrës, ose persona të tretë sulmohen në institucionet e ekzekutimit të vendimeve penale me mjete të rrezikshme për shëndetin apo jetën, vetëm në masën e nevojshme për të parandaluar dhe neutralizuar sulmin;
ç) Në rast se, për shkak të situatave emergjente, është e nevojshme ruajtja e rendit dhe e sigurisë në institucionin e ekzekutimit të vendimeve penale, ose e jetës dhe e shëndetit të të burgosurve, të punonjësve të Policisë së Burgjeve, të punonjësve të tjerë apo të personave të tjerë të pranishëm në institucionet e ekzekutimit të vendimeve penale;
d) Kur është e nevojshme për të siguruar që një i burgosur të ndalojë kryerjen e një veprimi të paligjshëm ose të ndjekë udhëzime të caktuara të ligjshme;
dh) Në çdo rast tjetër kur punonjësi i Policisë së Burgjeve është i detyruar të mbrojë jetën, shëndetin, të drejtat dhe interesat e tij ose të një tjetri, nga një sulm i padrejtë, i vërtetë dhe i çastit, vetëm në masën e nevojshme për të parandaluar e neutralizuar sulmin.

9. Punonjësi i Policisë së Burgjeve përdor pajisje kufizuese vetëm në raste të veçanta, me qëllim:

a) garantimin e rendit e të sigurisë në institucionet e ekzekutimit të vendimeve penale nga çdolloj cenimi, që mund të kanoset nga të burgosurit apo persona të tretë;
b) parandalimin e arratisjes dhe garantimin e sigurisë fizike gjatë kryerjes së veprimeve procedurale penale, shoqërimit ose transferimit të të burgosurve jashtë ambienteve të institucioneve të ekzekutimit të vendimeve penale;
c) parandalimin e arratisjes së të burgosurit nga institucionet e ekzekutimit të vendimeve penale;
ç) sigurimin e ruajtjes së të burgosurve në institucione ose qendra shëndetësore;
d) garantimin e sigurisë fizike personale apo të shëndetit të vetë të burgosurit, në rastet kur i burgosuri ka rrezik të dëmtojë veten e tij;
dh) parandalimin e kryerjes së një krimi, me qëllim shmangien e kërcënimeve serioze për integritetin fizik të personave të tjerë apo të vetë personit.

10. Punonjësi i Policisë së Burgjeve, në rastet kur diktohet përdorimi i armës, fillimisht paralajmëron të burgosurin apo personin që cenon sigurinë se do të përdorë armën. Nëse situata vijon të përbëjë rrezik, sipas parashikimeve të pikës 8, të këtij vendimi, punonjësi i Policisë së Burgjeve përdor armën në atë masë që është e nevojshme për të kontrolluar situatën, por duke sjellë sa më pak dëmtime në shëndetin e personit.

11. Në rastet kur është objektivisht i pamundur njoftimi paraprak për përdorimin e armës, punonjësi i Policisë së Burgjeve e përdor armën në atë masë që është e nevojshme për të kontrolluar situatën, por duke sjellë sa më pak dëmtime në shëndetin e personit.

12. Përdorimi i armës ndalon menjëherë pasi personi është neutralizuar apo situata është vendosur nën kontroll.

13. Pajisjet kufizuese, që përdoren nga Policia e Burgjeve, përzgjidhen për t’u përdorur në përputhje me situatën që i dikton ato.

14. Përdorimi i pajisjeve të tjera kufizuese gjatë ushtrimit të detyrës bëhet në mënyrë të përshkallëzuar dhe në proporcion me situatën. Intensiteti i përdorimit të pajisjeve kufizuese duhet të jetë i atillë që masa e vendosur është efektive për të arritur neutralizimin apo kontrollin e situatës.

15. Përdorimi i pajisjeve kufizuese lejohet si masë paraprake edhe gjatë ruajtjes, transferimit apo shoqërimit, me kusht që ato të hiqen kur i burgosuri del përpara një organi gjyqësor ose administrativ, me përjashtim të rasteve kur organet e procedimit vendosin ndryshe. Në raste të tilla informohet menjëherë një institucion shëndetësor dhe drejtuesi i institucionit të ekzekutimit të vendimeve penale.

16. Kur arsyeja për përdorimin e pajisjes kufizuese pushon së ekzistuari, përdorimi ndalet menjëherë.

17. Në çdo rast, ndalohet përdorimi i zinxhirëve dhe i hekurave, si dhe çdo mjet tjetër që e vendos personin në kushtet e torturës, trajtimit ose dënimit çnjerëzor apo degradues.

18. Nuk lejohet përdorimi i pajisjeve kufizuese për gratë e burgosura shtatëzana gjatë lindjes apo menjëherë pas lindjes së fëmijës.

19. Përveç rastit të përdorimit të prangave gjatë shoqërimit, punonjësi i Policisë së Burgjeve njofton sa më parë eprorin për përdorimin e armës apo të pajisjeve të tjera kufizuese. Kur përdoren pajisje kufizuese shtrënguese, si: këmishat e forcës, rrip mesi kufizues apo rrjeta izoluese, punonjësi i Policisë së Burgjeve, përveç eprorit, njofton edhe drejtuesin e institucionit, i cili lajmëron menjëherë mjekun ose kujdesin tjetër shëndetësor për të verifikuar masën e përdorimit të pajisjes kufizuese dhe dëmtime të mundshme të shëndetit.

20. Sipas përdorimit, armët dhe pajisjet kufizuese mbahen me vete ose në depo të veçanta, në rafte të individualizuara, gati për përdorim të menjëhershëm dhe u jepen punonjësve sipas planit të masave para fillimit të veprimeve.

21. Prangat dhe shkopinjtë e gomës mbahen me vete nga punonjësit e Policisë së Burgjeve. Ato dorëzohen në institucion jashtë orarit të shërbimit.

22. Lëvizja e armëve dhe e pajisjeve kufizuese nga njëri institucion në tjetrin bëhet me urdhër ose plan shpërndarjeje të miratuar nga drejtori i Përgjithshëm i Burgjeve.

23. Çdo punonjës në institucion është përgjegjës për ruajtjen dhe mbrojtjen e armëve e të pajisjeve kufizuese dhe të dokumentacionit të institucionit kundrejt humbjeve, vjedhjeve, keqpërdorimit dhe përdorimit të paautorizuar të tyre, sipas kompetencave që mbulon, duke dokumentuar veprimet e ndërmarra prej tij, për të siguruar ruajtjen e mirëmbajtjen e armatimit dhe të pajisjeve të policisë që ka nën përgjegjësi.

24. Punonjësi, që ka kontakt të drejtpërdrejtë me të burgosurit, dhe personeli që punon me grupe të veçanta të burgosurish, para se të marrë detyrën, i nënshtrohet trajnimit të detyrueshëm për përdorimin e armëve dhe pajisjeve kufizuese.

25. Punonjësi, para se të marrë detyrën, trajnohet për teknikat e përdorimit të pajisjeve kufizuese dhe teknikat, që bëjnë të mundur përdorimin minimal të forcës për të kthyer vetëkontrollin te të burgosurit agresivë.

26. Trajnimi i punonjësve të Policisë së Burgjeve bëhet në përputhje me rregulloren e personelit të Policisë së Burgjeve dhe moduleve të posaçme, me qëllim marrjen e njohurive teorike dhe praktike për teknikat dhe intensitetin e përdorimit të armëve e të pajisjeve kufizuese.

III. DISPOZITA TË FUNDIT

21. Ngarkohen Ministria e Drejtësisë dhe Drejtoria e Përgjithshme e Burgjeve për zbatimin e këtij vendimi.

Ky vendim hyn në fuqi pas botimit në “Fletoren zyrtare”.

K R Y E M I N I S T R I
EDI RAMA

***

V E N D I M
PËR

PËRCAKTIMIN E RREGULLAVE TË HOLLËSISHME PËR PËRMBAJTJEN E REGJISTRIT TË STARTUP-EVE DHE LEHTËSUESVE, MËNYRËN E FUNKSIONIMIT DHE NDËRLIDHJEN E TIJ ME PORTALIN QEVERITAR “E-ALBANIA”, SI DHE PËR DOKUMENTET ELEKTRONIKE – PASAPORTA E STARTUP-EVE DHE PASAPORTA E LEHTËSUESVE

Në mbështetje të nenit 100 të Kushtetutës, të pikës 5, të nenit 11, të ligjit nr.25, datë 31.3.2022, “Për mbështetjen dhe zhvillimin e startup-eve”, dhe të nenit 4, të ligjit nr.10325, datë 23.9.2010, “Për bazat e të dhënave shtetërore”, me propozimin e ministrit të Shtetit për Mbrojtjen e Sipërmarrjes, Këshilli i Ministrave

V E N D O S I:

I. DISPOZITA TË PËRGJITHSHME

1. Krijimin e regjistrit të startup-eve dhe lehtësuesve për mbajtjen e të dhënave të startup-eve dhe të lehtësuesve të vetëdeklaruar për kërkuesit dhe përfituesit e granteve e të masave mbështetëse nga ministri përgjegjës për sipërmarrjen.

2. Regjistri i startup-eve dhe lehtësuesve, si bazë të dhënash, funksionon, administrohet dhe ndërvepron me bazat e tjera të të dhënave, në përputhje me rregullat e legjislacionit në fuqi për bazat e të dhënave shtetërore.

II. PËRMBAJTJA E REGJISTRIT

1. Të dhënat, që përmban regjistri i startup-eve, ndahen në të dhëna parësore dhe dytësore, si më poshtë vijon:

a) Të dhëna parësore për startup-et do të konsiderohen:

i. Numri unik i identifikimit;
ii. Emri i startup-it;
iii. Emri dhe mbiemri i sipërmarrësit;
iv. Numri i pjesëtarëve të startup-it;
v. Fusha ku operon;
vi. Faza në të cilën ndodhet startup-i;
vii. Përshkrimi i startup-it.

b) Të dhëna dytësore për startup-et konsiderohen këto të dhëna:

i. Gjenealitetet e individit (për startup-et nisura nga individë);
ii. Të dhënat e regjistrit tregtar për datën e regjistrimit të subjektit, emrin e subjektit/shoqërisë tregtare, numrin unik të identifikimit të subjektit, llojin e shoqërisë tregtare (formën e organizimit të saj), fushën e veprimtarisë dhe misionin e tij/saj, statusin e tij për startup-et e nisura nga shoqëri tregtare apo persona fizikë tregtarë;
iii. Kontakte.

2. Të dhënat, që përmban regjistri i lehtësuesve të startup-eve, ndahen në të dhëna parësore dhe dytësore, si më poshtë vijon:

a) Të dhënat parësore për lehtësuesit konsiderohen:

i. Numri unik i identifikimit;
ii. Emri i lehtësuesit;
iii. Të dhënat e përfaqësuesit ligjor;
iv. Data e themelimit;
v. Fusha e veprimtarisë;
vi. Kontakte.

b) Të dhëna dytësore për lehtësuesit konsiderohen, si më poshtë vijon:

i. Gjenealitetet e përfaqësuesit ligjor;
ii. Të dhënat e regjistrit të organizatave jofitimprurëse/subjektit tregtar/lehtësuesve, data e regjistrimit të organizatës/subjektit, emri i organizatës/subjektit, forma e organizimit të saj/tij, fusha e veprimtarisë dhe misioni i saj/tij, statusi i saj/tij;
iii. Selia/vendndodhja;
iv. Të dhënat e identifikimit të themeluesve;
v. Përshkrimi i shërbimeve që ofron.

III. NDËRLIDHJA ME BAZËN E TË DHËNAVE

1. Mbrojtja dhe përpunimi i të dhënave të grumbulluara bazohet në:

a) parimin e ndershmërisë, të drejtësisë dhe të ligjshmërisë;
b) grumbullimin për qëllime specifike, të përcaktuara qartë dhe në përputhje me këto qëllime;
c) saktësinë nga ana faktike dhe, kur është e nevojshme, përditësimin e kryerjen e çdo veprimi për të siguruar që të dhënat e pasakta të ndryshohen ose të rregullohen;
ç) garantimin e masave teknike dhe organizative të përshtatshme për të mbrojtur të dhënat personale nga shkatërrime të paligjshme, humbje aksidentale, për të mbrojtur aksesin ose përhapjen nga persona të paautorizuar, veçanërisht kur përpunimi i të dhënave bëhet në rrjet, si dhe nga çdo formë tjetër e paligjshme përpunimi;
d) kryerjen e çdo veprimi në sistem lidhur me aksesin, ndryshimin, korrigjimin, përhapjen e të dhënave etj., duke lënë gjurmë me qëllim garantimin e sigurisë dhe konfidencialitetin e të dhënave.

2. Të dhënat e mbledhura nga regjistri mund të përdoren për kërkime shkencore e statistikore, analiza, vlerësime apo projekte të ndryshme, sipas legjislacionit në fuqi për mbrojtjen e të dhënave personale.

3. Të dhënat e regjistrit përditësohen periodikisht nga struktura përgjegjëse, sa herë është e nevojshme, apo ka ndryshime të këtyre të dhënave.

4. Përdoruesit e bazës së të dhënave janë të përcaktuar në 4 nivele:

a) Lexues;
b) Redaktues;
c) Administrator;
ç) Auditues.

5. Subjektet e interesuara për bazën e të dhënave do t’i nënshtrohen nivelit të aksesimit si lexues, sipas ndarjes në shkronjën “a”, të pikës 4, të këtij kreu. Rolet e “redaktuesit”, “administratorit” dhe “audituesit”, ushtrohen nga struktura përgjegjëse pranë ministrit përgjegjës për sipërmarrjen, në përputhje me manualin e përdorimit të regjistrit që miratohet, sipas pikës 1, të kreut V, të këtij vendimi.

6. Struktura përgjegjëse pranë ministrit përgjegjës për sipërmarrjen do të jetë dhënësi i informacionit për subjektet e interesuara, në pikën 5, të këtij kreu.

7. Baza e të dhënave të regjistrit të startup-eve dhe lehtësuesve ndërvepron nëpërmjet shkëmbimit elektronik të të dhënave me:

a) bazën e të dhënave shtetërore të regjistrit tregtar;
b) bazën e të dhënave të regjistrit elektronik të organizatave jofitimprurëse/lehtësuesve;
c) bazën e të dhënave të Regjistrit Kombëtar të Gjendjes Civile.

IV. DOKUMENTET ELEKTRONIKE

1. Dokumenti elektronik i pasaportës së startup-it gjenerohet nga portali qeveritar “e-Albania”, pas plotësimit të formularit të vetëdeklarimit dhe përmban të dhënat, si më poshtë vijon:

a) Numrin unik të identifikimit të startup-it;
b) Emrin e startup-it;
c) Numrin personal të startup-it, gjeneruar nga plotësimi i formularit të vetëdeklarimit në regjistrin e startup-eve;
ç) Vlefshmërinë.

2. Dokumenti elektronik i pasaportës së lehtësuesit gjenerohet nga portali qeveritar “e-Albania”, pas plotësimit të formularit të vetëdeklarimit dhe përmban të dhënat, si më poshtë vijon:

a) Numrin unik të identifikimit të lehtësuesit;
b) Emrin e lehtësuesit;
c) Numrin personal të lehtësuesit, gjeneruar nga plotësimi i formularit të vetëdeklarimit ne regjistrin e lehtësuesve;
ç) Vitin e krijimit.

V. DISPOZITA TË FUNDIT

1. Ministri përgjegjës për sipërmarrjen është përgjegjës për menaxhimin e regjistrit dhe krijimin e manualit të përdorimit të regjistrit.

2. Ngarkohen ministri përgjegjës për sipërmarrjen dhe Agjencia Kombëtare e Shoqërisë së Informacionit për zbatimin e këtij vendimi.

Ky vendim hyn në fuqi pas botimit në “Fletoren zyrtare”.

K R Y E M I N I S T R I
EDI RAMA

***

V E N D I M
PËR

PËRCAKTIMIN E RREGULLAVE TË HOLLËSISHME PËR VEPRIMTARINË DHE MËNYRËN E OFRIMIT TË SHËRBIMIT START UP ONE-STOP-SHOP, SI DHE SHËRBIMEVE PËR TË CILAT APLIKOHET TARIFA ZERO PËR MBËSHTETJEN E START UP-EVE

Në mbështetje të nenit 100 të Kushtetutës dhe të neneve 9, shkronja “a”, e 12, pika 3, të ligjit nr.25/2022, “Për mbështetjen dhe zhvillimin e start up-eve”, me propozimin e ministrit të Shtetit për Mbrojtjen e Sipërmarrjes, Këshilli i Ministrave

V E N D O S I:

I. DISPOZITA TË PËRGJITHSHME

1. Objekt i këtij vendimi është përcaktimi i rregullave të hollësishme për veprimtarinë dhe mënyrën e ofrimit të shërbimit start up one-stop-shop, pranë ministrit përgjegjës për sipërmarrjen, si dhe përcaktimi i shërbimeve për mbështetjen e start up-eve, për të cilat do të aplikohet tarifa zero.

2. Qëllimi i këtij vendimi është nxitja e zhvillimit dhe e rritjes së start up-eve përmes përcaktimit të rregullave për shërbimin start up one-stop-shop, si një mekanizëm për mbështetjen e tyre, në përputhje me parimin pa letër dhe tarifa zero në ofrimin e shërbimeve të përcaktuara në këtë vendim.

II. MËNYRA E OFRIMIT TË SHËRBIMIT START UP ONE-STOP-SHOP

3. Shërbimi start up one-stop-shop ofrohet pranë ministrit përgjegjës për sipërmarrjen dhe në bashkëpunim me institucione të tjera publike, si më poshtë vijon:

a) Qendra Kombëtare e Biznesit (QKB);
b) Agjencia Shqiptare e Zhvillimit të Investimeve (AIDA);
c) Agjencia Kombëtare e Shoqërisë së Informacionit (AKSHI);
ç) Drejtoria e Përgjithshme e Pronësisë Industriale (DPPI);
d) Drejtoria e të Drejtave të Autorit pranë Ministrisë së Kulturës;
dh) Agjencia Kombëtare e Punësimit dhe Aftësive (AKPA);
e) Inspektorati Shtetëror i Punës dhe Shërbimeve Shoqërore;
ë) Drejtoria e Përgjithshme e Tatimeve;
f) Drejtoria e Përgjithshme e Doganave.

4. Struktura përgjegjëse për ofrimin e shërbimit start up one-stop-shop pranë ministrit përgjegjës për sipërmarrjen bashkëpunon me institucionet publike të përmendura në pikën 3, të këtij vendimi. Për ofrimin e shërbimit start up one-stop-shop ndiqet procedura, si më poshtë vijon:

a) Struktura përgjegjëse për ofrimin e shërbimit start up one-stop-shop u përgjigjet nevojave të start up-eve për shërbime dhe informacion bazuar në parimin “pa letër dhe tarifa zero”, për shërbimet e përcaktuara në pikën 7, të këtij vendimi;
b) Struktura përgjegjëse për ofrimin e shërbimit start up one-stop-shop mban kontakte të vazhdueshme me institucionet për të asistuar start up-et për fushën e tyre të përgjegjësisë dhe kompetencave;
c) Start up-i dhe kërkesa e tij asistohet e ndiqet nga struktura përgjegjëse për ofrimin e shërbimit start up one-stop-shop, deri në përmbushjen e saj nga institucionet, brenda fushës së përgjegjësisë dhe kompetencave të tyre;
ç) Struktura përgjegjëse për ofrimin e shërbimit start up one-stop-shop bashkëpunon me institucionet për ndërgjegjësimin e start up-eve, sipas fushës së përgjegjësisë dhe kompetencave të tyre;
d) Institucionet japin informacion sipas kërkesës së komisionit të vlerësimit për projektet aplikuese për përfitim nga granti për start up-et dhe lehtësuesit, për fushën e tyre të përgjegjësisë dhe kompetencave.

5. Struktura përgjegjëse për ofrimin e shërbimit start up one-stop-shop përgjigjet dhe informon për procedurën e kriteret e aplikimit në skemën e grantit, të parashikuar në nenin 14, të ligjit nr.25/2022, “Për mbështetjen dhe zhvillimin e start up-eve”, dhe akteve nënligjore në zbatim të tij.

6. Struktura përgjegjëse për ofrimin e shërbimit start up one-stop-shop monitoron periodikisht start up-et dhe lehtësuesit e start up-eve, që kanë përfituar masë mbështetëse nëpërmjet granteve, me qëllim verifikimin e përputhshmërisë së zbatimit të pikës 1, të nenit 15, të ligjit nr.25/ 2022, “Për mbështetjen dhe zhvillimin e start up-eve”.

III. SHËRBIMET PËR TË CILAT APLIKOHET TARIFA ZERO

7. Shërbimet për të cilat aplikohet parimi i tarifës zero gjatë procesit të mbështetjes dhe zhvillimit të start up-eve të vetëdeklaruara në regjistrin e start up-eve janë, si më poshtë vijon:

a) Dhënie informacioni dhe këshillim për kuadrin ligjor rregullator në fuqi për start up-et dhe personat fizikë e juridikë;
b) Dhënie informacioni dhe këshillim për detyrimet lidhur me marrëdhëniet e punës, sigurinë dhe shëndetin në punë;
c) Dhënie informacioni dhe këshillim për detyrimin për regjistrimin në regjistrin tregtar, në përputhje me legjislacionin për tregtarët dhe shoqëritë tregtare;
ç) Dhënie informacioni dhe këshillim për detyrimet fiskale dhe detyrime të tjera që rrjedhin nga regjistrimi në regjistrin tregtar dhe atë të vetëdeklarimit si start up;
d) Vetëdeklarimi në regjistrin e start up-eve, të parashikuar në nenin 11, të ligjit nr.25/2022, “Për mbështetjen dhe zhvillimin e start up-eve”;
dh) Dhënie informacioni dhe këshillim për regjistrimin dhe mbrojtjen e pronësisë intelektuale;
e) Dhënie informacioni dhe këshillim për investimet strategjike bazuar në legjislacionin në fuqi për investimet;
ë) Dhënie informacioni, këshillim dhe mundësi rrjetëzimi me investitorë të huaj, strategjikë, engjëj biznesi, fonde të mbledhura;
f) Dhënie informacioni, këshillim dhe gjetje partneritetesh, duke mundësuar kontaktet dhe lidhjen me rrjete ndërkombëtare për ndërmarrjet, start up-et dhe investitorët;
g) Mbështetje, informacion dhe këshillim për grantet, fondet dhe masat e tjera mbështetëse të vëna në dispozicion nga qeveria;
gj) Mbështetje, informacion dhe këshillim për grantet ose fondet e donatorëve të tjerë të huaj dhe vendas në Shqipëri.

8. Parimi i tarifës zero për shërbimet e përcaktuara në pikën 7, të këtij vendimi, aplikohet vetëm gjatë periudhës 24-mujore të inkubimit të përcaktuar në pikën 2, të nenit 10, të ligjit nr.25/ 2022, “Për mbështetjen dhe zhvillimin e start up-eve”.

IV. DISPOZITA TË FUNDIT

9. Për sa nuk është parashikuar shprehimisht në këtë vendim dhe nuk bie në kundërshtim me të, zbatohen rregullat e përcaktuara me vendimin nr.867, datë 10.12.2014, të Këshillit të Ministrave, “Për procedurat e bashkëpunimit në institucionet e administratës shtetërore”, të ndryshuar.

10. Ngarkohen ministri përgjegjës për sipërmarrjen dhe institucionet e përmendura në pikën 3 për zbatimin e këtij vendimi.

Ky vendim hyn në fuqi pas botimit në “Fletoren zyrtare”.

K R Y E M I N I S T R I
EDI RAMA

***

V E N D I M
PËR

SHPRONËSIMIN, PËR INTERES PUBLIK, TË PRONARËVE TË PASURIVE TË PALUAJTSHME, PRONË PRIVATE, QË PREKEN NGA ZBATIMI I PROJEKTIT “SISTEMIM RRUGËSH, BLLOKU TE STADIUMI”, POGRADEC

Në mbështetje të nenit 100 të Kushtetutës dhe të neneve 5, pika 1, 20 e 21, të ligjit nr.8561, datë 22.12.1999, “Për shpronësimet dhe marrjen në përdorim të përkohshëm të pasurisë, pronë private, për interes publik”, të ndryshuar, me propozimin e ministrit të Infrastrukturës dhe Energjisë, Këshilli i Ministrave

V E N D O S I:

1. Shpronësimin, për interes publik, të pronarëve të pasurive të paluajtshme, pronë private, që preken nga zbatimi i projektit “Sistemim rrugësh, blloku te stadiumi”, Pogradec.

2. Shpronësimi bëhet në favor të Bashkisë Pogradec.

3. Pronarët e pasurive të paluajtshme, që shpronësohen, të kompensohen në vlerë të plotë, sipas masës së kompensimit përkatës, që paraqitet në tabelat bashkëlidhur këtij vendimi, për pasuritë e llojit tokë “truall” dhe “ndërtesë”, me vlerë 23 004 584.25 (njëzet e tre milionë e katër mijë e pesëqind e tetëdhjetë e katër pikë njëzet e pesë) lekë.

4. Vlera e përgjithshme e shpronësimit, prej 23 004 584.25 lekë (njëzet e tre milionë e katër mijë e pesëqind e tetëdhjetë e katër pikë njëzet e pesë) lekësh, përballohet nga llogaria “Fondi i shpronësimeve”, në Bankën e Shqipërisë.

5. Shpenzimet procedurale, në vlerën 50 000 (pesëdhjetë mijë) lekë, përballohen nga buxheti i miratuar për Ministrinë e Infrastrukturës dhe Energjisë.
6. Shpronësimi fillon menjëherë pas botimit të këtij vendimi në “Fletoren zyrtare” dhe afati i përfundimit të shpronësimit të jetë brenda 3 (tre) muajve nga data e hyrjes në fuqi të tij.

7. Pronarët e pasqyruar në tabelën, që i bashkëlidhet këtij vendimi, kompensohen, për efekt shpronësimi, pasi të kenë paraqitur certifikatën e pronësisë, kartelën e pasurisë, si dhe hartën treguese të regjistrimit në Bashkinë Pogradec.

8. Bashkia Pogradec kryen procedurat për likuidimin e pronarëve të shpronësuar, sipas përcaktimeve të bëra në këtë vendim.

9. Afati i fillimit dhe i përfundimit të punimeve të jetë në përputhje me afatet e parashikuara nga Bashkia Pogradec.

10. Agjencia Shtetërore e Kadastrës, Drejtoria Vendore Pogradec, në bashkëpunim me Bashkinë Pogradec, brenda 30 (tridhjetë) ditëve nga data e miratimit të këtij vendimi, fillon procedurat për hedhjen e gjurmës së projektit mbi hartat kadastrale, sipas planimetrisë së shpronësimit të miratuar, dhe bën regjistrimin e kalimit të pronësisë në favor të Bashkisë Pogradec.

11. Agjencia Shtetërore e Kadastrës, Drejtoria Vendore Pogradec, pezullon të gjitha transaksionet me pasuritë e shpronësuara, deri në momentin kur do të realizohen procesi i hedhjes së gjurmës së projektit mbi hartat kadastrale dhe kalimi i pronësisë në favor të Bashkisë Pogradec.

12. Ngarkohen Ministria e Infrastrukturës dhe Energjisë, Agjencia Shtetërore për Shpronësimin, Bashkia Pogradec, si dhe Agjencia Shtetërore e Kadastrës, Drejtoria Vendore Pogradec, për zbatimin e këtij vendimi.

Ky vendim hyn në fuqi menjëherë dhe botohet në “Fletoren zyrtare”.

K R Y E M I N I S T R I
EDI RAMA

***

AKT NORMATIV
PËR

NJË SHTESË NË AKTIN NORMATIV NR.7, DATË 18.3.2022, TË KËSHILLIT TË MINISTRAVE, “PËR TRANSPARENCËN DHE MONITORIMIN E ÇMIMIT PËR DISA PRODUKTE USHQIMORE BAZË DHE PRODUKTE TË TJERA TË LIDHURA ME TO, SI PASOJË E SITUATËS SË VEÇANTË TË KRIJUAR NË TREG”

Në mbështetje të nenit 101 të Kushtetutës, me propozimin e ministrit të Financave dhe Ekonomisë, Këshilli i Ministrave

V E N D O S I:

Neni 1

Pas fjalisë së parë, të pikës 2, të nenit 8, të aktit normativ nr.7, datë 18.3.2022, të Këshillit të Ministrave, shtohet fjalia, me këtë përmbajtje:

“Për mbajtjen e rezervave sipas kësaj pike, me qëllim përballimin e situatës së veçantë të krijuar në treg, Këshilli i Ministrave miraton garanci shtetërore të huas me bankat tregtare për garantimin e huamarrjes së subjekteve që tregtojnë me shumicë produkte ushqimore bazë, si dhe kushtet e kriteret e marrëveshjes tip të garancisë dhe marrëveshjes tip të mirëkuptimit.”.

Neni 2

Ky akt normativ hyn në fuqi menjëherë dhe botohet në “Fletoren zyrtare”.

K R Y E M I N I S T R I
EDI RAMA

***

V E N D I M
PËR

NJË SHTESË NË VENDIMIN NR.201, DATË 25.3.2021, TË KËSHILLIT TË MINISTRAVE, “PËR PËRDORIMIN E FONDIT TË RINDËRTIMIT PËR FINANCIMIN E RIFORCIMIT TË NJËSIVE TË BANIMIT NË NDËRTESA (PALLAT) NË BASHKITË DURRËS DHE KAMZË”

Në mbështetje të nenit 100 të Kushtetutës, të neneve 13, shkronja “b”, nënndarja “i”, dhe 36, të aktit normativ nr.9, datë 16.12.2019, të Këshillit të Ministrave, “Për përballimin e pasojave të fatkeqësisë natyrore”, miratuar me ligjin nr.97/2019, të ligjit nr.9936, datë 26.6.2008, “Për menaxhimin e sistemit buxhetor në Republikën e Shqipërisë”, të ndryshuar, dhe të nenit 7, të ligjit nr.115/2021, “Për buxhetin e vitit 2022”, të ndryshuar, me propozimin e Zëvendëskryeministrit dhe ministër i Shtetit për Rindërtimin dhe Programin e Reformave, Këshilli i Ministrave

V E N D O S I:

1. Në vendimin nr.201, datë 25.3.2021, të Këshillit të Ministrave, pas pikës 2 shtohet pika 2/1, me këtë përmbajtje:

“2/1. Përdorimin e fondit të rindërtimit, miratuar për vitin 2022, në masën 278 585 905 (dyqind e shtatëdhjetë e tetë milionë e pesëqind e tetëdhjetë e pesë mijë e nëntëqind e pesë) lekë pa TVSH, për financimin e riforcimit të njësive të banimit në ndërtesa (pallat), të cilat janë klasifikuar si objekte të pabanueshme ose të dëmtuara rëndë apo të dëmtuara lehtë dhe që nuk duhen rindërtuar nga e para, por kanë nevojë për punime rikonstruksioni ose riparime, i cili do të përballohet nga hapësira buxhetore e siguruar pas ngurtësimit në të njëjtën masë të fondeve të projekteve të rindërtimit me ecuri të ngadaltë dhe u transferohet bashkive Durrës dhe Kamzë në formën e transfertës së pakushtëzuar, sipas detajimit të mëposhtëm:

a) Bashkisë Durrës i transferohet fondi, në masën 100 000 000 (njëqind milionë) lekë pa TVSH;
b) Bashkisë Kamzë i transferohet fondi, në masën 178 585 905 (njëqind e shtatëdhjetë e tetë milionë e pesëqind e tetëdhjetë e pesë mijë e nëntëqind e pesë) lekë pa TVSH.

2. Ngarkohen Zëvendëskryeministri dhe ministër i Shtetit për Rindërtimin dhe Programin e Reformave, Ministria e Financave dhe Ekonomisë dhe bashkitë Durrës dhe Kamzë për zbatimin e këtij vendimi.

Ky vendim hyn në fuqi menjëherë dhe botohet në “Fletoren zyrtare”.

K R Y E M I N I S T R I
EDI RAMA

***

V E N D I M
PËR

PËRCAKTIMIN E KËRKESAVE DHE KRITEREVE QË DUHET TË PLOTËSOJNË STARTUP-ET DHE LEHTËSUESIT E STARTUP-EVE, SI DHE MIRATIMIN E PROCEDURAVE DHE AFATEVE TË THIRRJES PËR PËRFITIMIN E GRANTEVE DHE MASAVE MBËSHTETËSE

Në mbështetje të nenit 100 të Kushtetutës dhe të pikës 3, të nenit 14, të ligjit nr.25, datë 31.3.2022, “Për mbështetjen dhe zhvillimin e startup-eve”, me propozimin e ministrit të Shtetit për Mbrojtjen e Sipërmarrjes, Këshilli i Ministrave

V E N D O S I:

I. DISPOZITA TË PËRGJITHSHME

1. Ky vendim ka si objekt përcaktimin e rregullave për mbështetjen me grant të startup-eve dhe lehtësuesve të startup-eve, të cilët zhvillojnë projekte inovative në fusha prioritare për zhvillimin e vendit, si:

a) Mbështetja e inovacionit në fusha prioritare për zhvillimin e vendit;
b) Mbështetja e iniciativave që kanë impakt pozitiv mjedisor;
c) Fuqizimi i rinisë;
ç) Fuqizimi i vajzave dhe grave sipërmarrëse;
d) Fuqizimi i përfshirjes sociale, diversiteti dhe impakti social;
dh) Prioritete të tjera, sipas urdhrit të ministrit të Shtetit për Mbrojtjen e Sipërmarrjes.

2. Nga kjo mbështetje me grant mund të përfitojnë startup-et dhe lehtësuesit e startup-eve të vetëdeklaruar në regjistrin elektronik, sipas nenit 11, të ligjit nr.25, datë 31.3.2022, “Për mbështetjen dhe zhvillimin e startup-eve”.

3. Përfitimi i startup-eve ose lehtësuesve të startup-eve nga mbështetja e programeve apo projekteve nga donatorët apo institucione financiare kombëtare dhe ndërkombëtare për mbulimin e shpenzimeve të projektit, të cilat janë kontribut i vetë kërkuesit dhe nuk mbulohen nga ky grant, nuk përbën pengesë për përfitimin e grantit, për të njëjtin projekt.

II. KËRKESAT DHE KRITERET PËR PËRFITIMIN E GRANTIT

1. Përfitojnë mbështetje me grant startup-t, sipas klasifikimit të mëposhtëm:

a) Startup-et në fazën fillestare;
b) Startup-et në fazën e rritjes;
c) Startup-et në fazën e zgjerimit.

2. Mbështeten me grant startup-et që plotësojnë kriteret e mëposhtme:

a) Startup-et në fazën fillestare, që kanë përfunduar ose janë duke ndjekur një program inkubimi/përshpejtimi;
b) Startup-et në fazën e rritjes, që janë të regjistruar në regjistrin tregtar nga 0-1 vit;
c) Startup-et në fazën e zgjerimit, që janë të regjistruar në regjistrin tregtar nga 1-5 vite.

3. Aktivitetet e lejuara në projektet e startup-eve, që do të përfitojnë mbështetjen me grant ,përfshijnë, si më poshtë vijon:

a) Pjesëmarrje në aktivitete, konkurse, panaire ndërkombëtare;
b) Pjesëmarrje në programe ndërkombëtare inkubimi deri në 3 (tre) muaj;
c) Rritje aftësish/kapacitetesh teknike;
ç) Blerje makinerie dhe/ose pajisjeje pune;
d) Zhvillimi i tregtisë elektronike dhe/ose software;
dh) Patenta dhe licenca;
e) Lëndë e parë dhe ambalazhim/etiketim produkti.

4. Përfitojnë mbështetje me grant lehtësuesit e startup-eve, sipas klasifikimit të mëposhtëm:

a) Akademia, e cila përfshin universitetet publike dhe private;
b) Lehtësuesit, si inkubatorët dhe përshpejtuesit;
c) Hapësirat e punës, të cilat përfshijnë ofruesit e ambienteve dhe pajisjeve të punës;
ç) Bashkitë, përveç Bashkisë së Tiranës;
d) Organizuesit e eventeve;
dh) Arsimi parauniversitar, i cili përfshin shkollat e mesme dhe shkollat profesionale publike dhe private.

5. Mbështeten me grant lehtësuesit e startup-eve, që plotësojnë kriteret e mëposhtme:

a) Duhet të jenë persona fizikë ose juridikë të regjistruar, përfshirë dhe organizatat jofitimprurëse;
b) Kanë fushë kryesore të veprimtarisë së tyre trajnimin, këshillimin ose dhënien e mbështetjes, nëpërmjet formave të ndryshme në fushën e inovacionit dhe/ose të teknologjisë ose në fusha të ngjashme me to;
c) Duhet të kenë përvojë në ofrimin e shërbimeve për mbështetjen e startup-eve, të cilat mund të përfshijnë:

i. ofrimin e ambienteve dhe hapësirave të punës, duke mundësuar regjistrimin e selive ligjore dhe ushtrimin e veprimtarive të biznesit në favor të startup-eve;
ii. ofrimin e mjeteve dhe pajisjeve të punës, si dhe shërbimeve të biznesit, të tilla si, zyra, ambiente dhe pajisje pune, kancelari, shërbime interneti me bandë ultra të gjerë, furnizim me energji dhe ujë;
iii. administrimin ose drejtimin nga persona me kompetenca dhe përvojë në biznes dhe inovacion;
iv. marrëdhënie të rregullta me institucione të arsimit të lartë, qendra kërkimore-shkencore apo partnerë financiarë, që kryejnë aktivitete dhe projekte në lidhje me startup-et;
v. ofrimin e programeve të inkubimit dhe/ose përshpejtimit, duke ofruar mentorim dhe këshillim, për realizimin dhe zhvillimin e ideve të biznesit, trajnim nëpërmjet ekspertësh të kualifikuar.

6. Aktivitetet e lejuara në projektet e lehtësuesve të startup-eve, që do të përfitojnë mbështetjen me grant, përfshijnë, si më poshtë vijon:

a) Infrastrukturë për krijimin e ambienteve dhe programeve të inkubatorëve;
b) Rritje kapacitetesh për stafin e universiteteve;
c) Hapësirë e përbashkët pune, e mbyllur me sistem rezervimi on-line;
ç) Konkurse kombëtare për startup-et (të përshkallëzuar nga kombëtarë në ndërkombëtarë);
d) Evente trajnimi/ndërgjegjësimi për startup-et me shtrirje kombëtare, në bashkëpunim me të paktën një partner ndërkombëtar;
dh) Shërbime mbështetëse, ekspertizë, shkëmbim njohurish për startup-et nga ekspertë ndërkombëtarë;
e) Evente ndërkombëtare në hapësirën e përbashkët të punës, me një audiencë me më shumë se 100 (njëqind) persona;
f) Akademi inovacioni për të rinjtë dhe bizneset (njohjen me teknikat e projektimit, gjenerimit të idesë, teknologjitë e reja dhe aplikimin e tyre në biznes).

III. PROCEDURAT DHE AFATET PËR PËRFITIMIN E GRANTIT

1. Kërkesa për mbështetje me grant do të kryhet on-line, nëpërmjet faqes dhe adresës elektronike të ministrisë përgjegjëse për sipërmarrjen.

2. Kërkesat i nënshtrohen procesit të vlerësimit nga ana e komisionit të vlerësimit, siç parashikohet në pikën 4, të nenit 14, të ligjit nr.25, datë 31.3.2022, “Për mbështetjen dhe zhvillimin e startup-eve”.

3. Miratimi i dhënies së grantit merret me vendim të Këshillit të Ministrave, pas propozimit nga ana e ministrit përgjegjës për sipërmarrjen të vendimit të komisionit të vlerësimit, bazuar në pikën 7, të nenit 14, të ligjit nr.25, datë 31.3.2022, “Për mbështetjen dhe zhvillimin e startup-eve”.

4. Projektet e shpallura fituese duhet të zbatohen në një afat maksimal 5 (pesë)-mujor nga data e nënshkrimit të marrëveshjes së fitimit të grantit, midis përfituesit dhe ministrit përgjegjës për sipërmarrjen.

5. Disbursimi i grantit për projektet e shpallura fituese bëhet deri në 3 këste, pas përfundimit të periudhës së mbylljes së çdo faze të projektit, kundrejt dorëzimit të faturës/ave të shpenzimeve të kryera dhe dokumentacionit të kërkuar, sipas procedurave dhe kritereve të përcaktuara në “Rregulloren e funksionimit grantit”.

IV. DISPOZITA TË FUNDIT

1. Në ushtrimin e detyrave, sipas përcaktimeve të këtij vendimi, dhe të pikës 2, të nenit 7, të ligjit nr.25, datë 31.3.2022, “Për mbështetjen dhe zhvillimin e startup-eve”, ministri përgjegjës për sipërmarrjen mbështetet nga sekretariati teknik i Këshillit Ekonomik Kombëtar.

2. Ngarkohen ministri përgjegjës për sipërmarrjen dhe sekretariati teknik i Këshillit Ekonomik Kombëtar për zbatimin e këtij vendimi.

Ky vendim hyn në fuqi pas botimit në “Fletoren zyrtare”.

K R Y E M I N I S T R I
EDI RAMA

***

V E N D I M
PËR

TRANSFERIMIN NË PRONËSI TË BASHKISË TIRANË, PËR NJËSINË ADMINISTRATIVE TIRANË, TË PASURIVE NR.6/119, ZONA KADASTRALE 8350, NR.3/576, ZONA KADASTRALE 8130, NR.7/155, ZONA KADASTRALE 8380, NR.7/87, ZONA KADASTRALE 8330, DHE NR.6/459, ZONA KADASTRALE 8180

Në mbështetje të nenit 100 të Kushtetutës dhe të neneve 3 e 5, të ligjit nr.8744, datë 22.2.2001, “Për transferimin e pronave të paluajtshme publike të shtetit në njësitë e qeverisjes vendore”, të ndryshuar, me propozimin e Zëvendëskryeministrit, Këshilli i Ministrave

V E N D O S I:

1. Transferimin në pronësi të Bashkisë Tiranë, për njësinë administrative Tiranë, të pasurive nr.6/119, zona kadastrale 8350, nr.3/576, zona kadastrale 8130, nr.7/155, zona kadastrale 8380, nr.7/87, zona kadastrale 8330, dhe nr.6/459, zona kadastrale 8180, sipas lidhjes 1, formularëve, gjithsej, 2 (dy) fletë, dhe planrilevimeve, që i bashkëlidhen këtij vendimi, me qëllim për t’u përdorur në fushën zhvillimit urban, shërbimeve dhe sportit.

2. Pasuritë e përmendura në pikën 1, të këtij vendimi, i shtohen listës përfundimtare të pjesshme të pronave të paluajtshme publike shtetërore, që i bashkëlidhet vendimit nr.219, datë 21.3.2017, të Këshillit të Ministrave, “Për miratimin e listës përfundimtare të pjesshme (pjesa e parë + pjesa e dytë) të pronave të paluajtshme publike shtetërore, që transferohen në pronësi ose në përdorim të njësisë administrative Tiranë, Bashkia Tiranë, të Qarkut të Tiranës”, të ndryshuar.
3. Ngarkohen Bashkia Tiranë dhe Agjencia Shtetërore e Kadastrës për zbatimin e këtij vendimi.

Ky vendim hyn në fuqi menjëherë dhe botohet në “Fletoren zyrtare”.

K R Y E M I N I S T R I
EDI RAMA  

 

 

*SHËNIM: BAZUAR NË NENIN 117 TË KUSHTETUTËS SË RSH DHE NENIT 29 TË LIGJIT PËR ORGANIZIMIN DHE FUNKSIONIMIN E KËSHILLIT TË MINISTRAVE, VENDIMET E KËSHILLIT TË MINISTRAVE PUBLIKOHEN NË FLETOREN ZYRTARE DHE HYJNË NË FUQI PAS BOTIMIT TË TYRE. DREJTORIA E KOMUNIKIMIT PRANË KËSHILLIT TË MINISTRAVE PËRPIQET TË BOTOJË NË KOHËN MË TË SHPEJTË TË MUNDSHME VENDIMET E MBLEDHJEVE TË QEVERISË, POR VERSIONI ZYRTAR DHE HYRJA E TYRE NË FUQI BËHET VETËM PASI VENDIMI BOTOHET NE QBZ. SHPESHHERË, VENDIMET E KËSHILLIT TË MINISTRAVE KANË NEVOJË PËR ZBARDHJE TË MËTEJSHME, ÇKA E VONON PUBLIKIMIN E TYRE NË KËTË FAQE.